Read njo ANITET 31 Bible Online

ANITET 31 - njo bible

ANITET 31

¹Tang KIBUBAi Mosa dang ashi,

²“Yihuda kidong nungi Uri jabaso Hur chir tenüng agi Bezalel ni shimtetogo,

³ni pa Tsüngrem tanelai sünga kümdaktsüogo aser tashi agütsüogo. Ni pa nem tangazükba, aser mapa tapu ajak inyaktettsü tangatetba agütsüogo.

⁴Hon, taribi, aser yongmenyin agi tesangra mapa tapu tapu yanglutsü;

⁵amenoktsü asoshi senti lung akusa-a aser süng agi tapu tapu jiteta yanglutsü asoshi ni pa nem tetangshi shisatsü agütsüogo.

⁶Pa den yaritepa inyaktsü asoshi ni Dan kidong nungi Ahisamak jabaso Oholiab shimtetogo. Ano tangar nisungtem nema ni shisa ka-a aser sangra-a mapa inyaktsü aser ni ashiba ama yanglutettsü parnok nem tesangra shisatsü agütsüogo.

⁷Sentep süki, tezüngzüktepba Ozüng Süngden, iba tesempangba, aser süki nung aliba oset ajak,

⁸langbang aser idakji aliba osettem, milendong atalokdak, hon aser liangmesen arongba osettem,

⁹tarongba tenla sabang aser iba osettem, shitoktsü asoshi tzü ayuba susa aser iba tamendaktsü;

¹⁰aser tobur junga yangluba süoshitem, Aron aser pa jabasotem putir mapa tenzükdaktsütsü asoshi temeshi putir sobutsü,

¹¹temezütsüba totzü, aser temeshidak asoshi teronem menemba liangmesen, ni ne dang melaba ama parnok ajaki inyaktsüla.”

¹²Idangji KIBUBAi Mosa dang ozüng agüja ashi,

¹³“Nai Israel chirtem dang jembia yamai shiang, atangji nenoki kü amungnü amungtsüla, kechiaser nenok meshiteta yutsüba KIBUBA nia ta nenoki metettsü asoshi putusa putu ni aser nenok tsüngda nung ya temaitsü ka lir.

¹⁴Amungnüji meshiteta mungang kechiaser nenok asoshi ibai temeshi lir. Kari iba anogo memungi mapa kar inyakra, iba nisungji pei nüburtem rongnungi leptoktsü.

¹⁵ Nenok mapa inyaktsü asoshi anogo troknü tashi kar, saka tenetnübubajibo ni asoshi temeshi anogo lir. Kari iba anogo nungji mapa inyakra pa südaktsütsüla.

¹⁶Aji asünung Israel nungeri iba anogoji tezüngzüktepba anogo temaitsü ama teti benshitsüla.

¹⁷Ibai Israel nunger aser ni tsüngda nung teti atema temaitsü ka alitsü, kechiaser ni KIBUBAi anogo trok tashi nung anüng aser alima yanglu; aser anogo tenetnübuba nung ni mapa nungi anisüngzüka mungzük.”

¹⁸Kodang Sinai tenem nung Tsüngremi Mosa den jembibaji anen, Tsüngremi pei temeyong agi lungpak ana nung pa temelaba ozüngtemji zülur Mosa nem agütsü.