Read njo ANITET 32 Bible Online

ANITET 32 - njo bible

ANITET 32

¹ Kodang Mosa tenem nungi mapang talangka malui liasü ta nüburtemi meteta aküm, parnoki külemi Aron dangi adenshia pa dang ashi, “Mosa shibai asenok Ijip lima nungi aniteta anir aru, pa kechi aküm onoki memetet; anungji asenok len anitsü asoshi tsüngrem ka yanglujang.”

²Aroni parnok dang ashi, “Nenok kinungtsürtem, nenok jala-jabasotemi anua aliba hon küritemji kü dangi bener arung.”

³Anungji nisung ajaki pei pei hon küriji Aron dangi bener aru.

⁴ Pai parnok ket nungi itemi agizük, aser aji mulusa-a nashi süngyanglu ka mulutet. Idangji nüburtemi ashi, “Ibai asenok tsüngremji lir o Israel, shibai asenok Ijip lima nungi anir aru!”

⁵Kodang Aroni hon agi mulutetba nashi süngyanglu jakdang tenladak sabang ka yanglu, pai yamai sangoktsü, “Asüng KIBUBA asoshi benjong ka alitsü.”

⁶ Tasüngji parnoki yakta shishia tarongba tenla asoshi shiruru ka anir aru, aser yimjung tenla agütsü. Iba sülen parnoki külemi mener chia ajem aser kati ka den asayateptsü tenzük.

⁷Idangji KIBUBAi Mosa dang ashi, “Yakta meyipa luang, kechiaser ne nübur shirnok nai Ijip nungi anizüka anir aru; parnok raksa-a kümogo.

⁸Ni melaba lenmang nungi parnok meyipogo, parnoki hon agi nashi süngyanglu ka muluteta iba nemji tarongba tenla agüja külemdaki. Ibaji parnok tsüngremtem, shibai parnok Ijip lima nungi anir aru ta parnoki ashir.

⁹Ano KIBUBAi Mosa dang ashi, iba nübur tekong temerang ta ni nguogo.

¹⁰Anungji kü ain tulu parnok anema adoka parnok samatsütsü asoshi tang kü kija tokjang. Aser ni na agi kin tulu ka kümdaktsüdi.”

¹¹ Mosai KIBUBA Tsüngrem dang mepishia ashi, “KIBUBA, ne nübur shirnok nai ne ain tulu aser tashi tait teka agi Ijip lima nungi anizüka anir aru, parnok anema kechiba na mit adoker?

¹²Tamajung atema pai parnok anizüka anir aru, tenem nung parnok tepsetdaktsütsü, aser ali jak nungi pai parnok samadaktsütsü atema ta kechiba Ijip nunger nem jembidaktsütsü? Na tetsübutsü ain aitba nungi meyipang, aser ne nübur anema tamajung inyaktsü aliba nungi ne mulung melenshiangma.

¹³ Ne tenzüker Abraham, Isak aser Yakob; parnok dang nai azüngashiba bilemtetangma. Anüng petinu ama ni ne metsü rendaktsütsü, aser ni iba lima indang jembiba ajak ne semchirtemi teti asoshi senmang amangtsü, ya ajak nai nangzükba to bilemtetangma.”

¹⁴ Anungji KIBUBAi pei nübur madaki koba lendong yoktsü ta ashi, iba nungi pa temulung meyip.

¹⁵Mosai meyipa oa pei teka nung aliba ozüng lungpak ana koba nung ozüng anatsülen zülua liasü, aji bener tenem nungi meyipa alu.

¹⁶Lungpakji Tsüngremi züluba liasü, aser iba nung angenpoka züluba ozüngtemjia pai züluba liasü.

¹⁷Kodang Yihusuai nüburtem asatepba olaji angashi, pai Mosa dang ashi, “Tanendak rara ola amai angashir.”

¹⁸Saka Mosai langzü, “Ola ya takok anguba ola masü mesüra tamakok anguba ola-a masü, saka ya kentenba ola ka ama nibo angashir.”

¹⁹Kodang Mosa tanendak anasai aru, pai nashi pungchi süngyanglu aser tsüngsangtepbaji ngua pa kanga ain adok, aser pai lungpakji tenem tsüng nung ondakja aji jaksatsü.

²⁰Aser parnoki mulutetba nashi süngyangluji pai bena arua mi nung arong, aser aji auyi küma menüngsar külen tzüma nung paloktsü; aser Israel nüburtem nem aji jemdaktsü.

²¹Pai Aron dang asüngdang, “Nai item nisungtem dak temenen patakati enoktsütsüsa parnoki ne dang kechi inyak?”

²²Aroni langzü, “Kü kibur, na ain sashia tatokma; iba nübur koma majung aji nai meteta lir,

²³kechiaser parnoki kü dang ashi, ‘Mosa shibai onok Ijip lima nungi anizüka anir aru, pa kechi aküm, onoki memetet; anungji onok len anitsü asoshi onok nem tsüngrem ka yanglujang.’

²⁴Aser ni parnok dang shiba ket nungsa hon agi yangluba osettem ali aji bener arung ta ashi, aser shirnok ket nungsa itemji liasü parnoki aji bener arua kü nem agütsü. Aji ni mi nung enoktsü, aser iba nungjagi nashi süngyanglu ya adok.”

²⁵Aroni nüburtem jabang mayimi kümdaktsüba ajanga tsükchirtemi sensatsüogo ta Mosai angu.

²⁶Anungji pai tanendak süngkhüm nung noktaker ayimtena ashi, “Shibasa KIBUBA tsütsü lir, pa kü dangi arung!” Aser Levi chirtem ajak pa anasa atenshi,

²⁷aser pai parnok dang ashi, “Israel Tsüngrem KIBUBAi yamai ashir, nenok nisung shiai pei nok am-ang aser süngkhüm külen nungi külen tatem tashi oa pei adianu, tembar aser kiyonger bushia tepsetang.”

²⁸Anungji Levi chirtemi Mosa o amaji inyak, aser parnoki iba anogo nungji nisung meyi asemshi tepset.

²⁹Idangji Mosai parnok dang ashi, “Tanü nenoki pei jabasotem aser adianutem tepsetba ajanga KIBUBA madang nenok putir mapa asoshi bendanga agütsüogo. Anungji KIBUBAi nenok tanü moatsüogo.”

³⁰Asüngji Mosai nüburtem dang ashi, “Nenoki tetsübutsüka temenen menaogo. Saka ni tang KIBUBA dangi tua nenok asoshi temenen pungitsü atema ni pa dang mepishitsü.”

³¹Idangji Mosai KIBUBA dangi meyip aser ashi, “Iba nüburtem yagi tesüngmangtsüka temenen menaogo. Parnoki pei asoshi hon agi süngyanglu tsüngrem ka yanglur ibaji külemogo.

³² Aji saka yimlibilema nai parnok tai tokangma; saka yamaji mesüra kaket koba nung nai ne nüburtem tenüng zülua ali iba nungjagi kü tenüngji aidokangma.”

³³Saka KIBUBAi Mosa dang langzü, “Shibaisa ni anema temenen menaogo, ni pa kü kaket nungi aidoktsü.

³⁴Anungji tang luang aser ni ne dang tuyuba linük jagi nüburtemji anir aramesoang. Ajiang kü tenyar ne jakdang aotsü; aji saka parnok temenen atema ni parnok merenshitsü anogo arudagi.”

³⁵Anungji KIBUBAi parnok madaki tashitak wara ka arudaktsü, kechiaser parnoki Aron nem hon agi nashi süngyanglu ka yangludaktsü.