Read njo ANITET 33 Bible Online

ANITET 33 - njo bible

ANITET 33

¹ Idangji KIBUBAi Mosa dang ashi, “Na aser ne nübur shirnok Ijip nungi nai anir adok, nenok ajak yang nungi aenshia ni Abraham, Isak aser Yakob dang ne semchisemnur nem agütsüdi ta azüngashia nangzükba lima jagi oang.

²Ni ne jakdang tenyar ka yoktsü, aser Kanan nunger, Amor nunger, Hit nunger, Periz nunger, Hiv nunger, aser Yebus nunger ajak ni aridoktsü.

³Nenok ali temo aser ninang mojitzü yima aliba lima kati aor. Saka nenok tekong temerang asünung, ni nenok lenmang nung samaja lir ta nibo nenok den maotsü.”

⁴Kodang nüburtemi iba osang angashi, parnoki mang ayim, aser parnok shingaia kisen aser küri naro magi.

⁵Kechiaser KIBUBAi Mosa dang ashi, “Nenok tekong temerang nisungtem lir. Ni nenok den kenpiga danga ora, ni nenok meshi meshia samatsütsü. Nenok dak kechi inyaktsü ali aji metettsü atema nenok kisen, aser küri naro agizükang.”

⁶Anungji Horeb tenem toktsür aodang Israel nungeri joko kisen küri naro magi.

⁷Tang Mosai tanendak tezülen, tanendak nungi sükiji apiga bener oagi yangluli asü; aser iba dangji sentep süki ta aja. Aser nisung kari KIBUBA dang langka asüngdangyanüra ajagi ao.

⁸Kodangsa Mosai sentep süki jagi aitsü apusodir nisungtemi pei süki kikümbang nung noktaker Mosa ajagi mai tashi repranga ali.

⁹Kodang Mosa süki jagi ai idangji mepet tongshi süki kiküm jagi alua noktak aser mepet tema nungi KIBUBAi Mosa den jembi.

¹⁰Kodangsa nüburtemi mepet tongshiji süki kiküm nung noktaka angu, parnoki pei süki kiküm nung apudaka KIBUBA külem.

¹¹Aser nisungi pei tembar den jembiba ama KIBUBAi Mosa den tejak o tejak na jitepa jembi. Kodang Mosa tanendaki meyipa shilang, pa yarir asangur ka Nun jabaso Yihusua süki nungji liasü.

¹²Idangji Mosai KIBUBA dang ashi, “Item nüburtem anir oang ta nai kü dang ashir, aji saka kü den shiba yoktsü ajibo nai kü dang mashir. Aji saka ni na metet aser nai kü jakdang taochi nguogo ta shiogo.

¹³Tang ni ne jakdang taochi ngura, ne lenmangtem kü dang sayuang, anungji ni na metettsü, aser na nungi ni maneni taochi angutsü. Ano iba kin ya ne nübur asütsü asoshi nai shimtet ta bilemtetangma.”

¹⁴KIBUBAi langzü, “Kü tatenba ne den aotsü aser ne nem anisüngzük agütsütsü.”

¹⁵Mosai langzü, “Ne tatenba onok den marura, onok yang nungi anir tuoma.

¹⁶Na onok den marura nüburtemi aser ni ne jakdang taochi nguogo ta kodaser metettsü? Alijak nung alir nisung ajak dang nungi ni aser iba nübur balaka kümdaktsübaji na tatenba onok den aoba agi masü no?”

¹⁷Aser KIBUBAi Mosa dang ashi, “Nai mepishiba ama ni aji inyaktsü, kechiaser kü tsüngdang nai yimjung nguogo aser ni ne tenüng junga metet.”

¹⁸Idangji Mosai mepishia ashi, “Yimlibilema kü dang ne sentsüwangshi sayuangma.”

¹⁹ KIBUBAi langzü, “Ni ne jakdang ni ajungba ama kü sentsüwangshi ngudaktsüdi aser kü temeshi tenüng metetdaktsüdi. Ni KIBUBA, aser ni shir dang aochidir parnok dang aochitsü, aser shir dang aria bilemdir parnok dang aria bilemtsü.

²⁰Ni ne nem kü tejak mungudaktsüli, kechiaser nisungi ni ngur taküm alitsü makok.

²¹Aser KIBUBAi ashi, ajiang ni anasa talidak ka lir, aser nai lungma nungji noktaktsüla.

²²Kodang kü sentsüwangshi süidir, ni na lung jakma nungji yutsüdi, aser ni süitema mao tashi kü teka agi na nembangtsüdi;

²³aji ser külen kü teka agiendi, idangji nai kü terongdong angutsü, saka kü tejakbo mangutsü.”