Read njo ANITET 34 Bible Online

ANITET 34 - njo bible

ANITET 34

¹Tang KIBUBAi Mosa dang ashi, “Mezüng inyakba ama nai lungpak ana angentetang, aser nai jaksaba lungpak nung aliba ozüngtemji ni idakji züludi,

²Asüngnep aji renema bener Sinai tenem kolaki atung, aser yangji tenem kolak nung nesasa kü madang liang.

³Ne den shinga matutsüla, aser tenem anasa nisung shinga mungudaktsütsüla, oda san telok mesüra nashi telok kecha tenem tsüng nungji mechiyimdaktsütsüla”.

⁴Anungji Mosai mezüng amato lungpak ana angentet aser KIBUBAi ashiba ama anepdang yakta aji pai teka nung amer Sinai tenemi atu.

⁵KIBUBA mepet manung alua pa den noktak, aser pa temeshi tenüng KIBUBA ta metetdaktsü.

⁶ Aser KIBUBAi pa jakdang süi, aser ya metetdaktsü, “Ni KIBUBA, yimlibilem aser aria bilemba agi sünga aliba Tsüngrem, shiba ain adoktsü meilungi, temeim aser tamang katetba agi sünga lir.

⁷Meyirijangsa meyirijang asoshi taochi sayur, tai, ozüng raksaba aser temenen asoshi tai atoker, saka aji agi kodanga tai menaba meshiteta mekümdaktsür; tsürabur tai atema chirnur dak, semchisemnur dak, putu asembuba aser pezübuba dak tashi mang ayanger.”

⁸Mosai yakta ali nung apudak aser KIBUBA külem.

⁹Pai ashi, “Oh KIBUBA, ni ne jakdang taochi ngura, ni ne dang mepishir, na onok den arungma. Iba nüburtem tekong temerang, saka nai onok tai-temenen tokangma, aser onok ne senmanger ama agizükangma.”

¹⁰Idangji KIBUBAi Mosa dang ashi, “Tang ni Israel nunger den tezüngzüktepba tasen ka yanglur. Parnok jakdang ni sayatenya mapa tulu ka, oda alima nung shinga kin daka meinyakba mapa ka ni inyaktsü. Ni KIBUBAi kechi mapa tulu inyaktsü ali, aji nisung ajaki angutsü, kechiaser ni nenok asoshi inyaktsü alibaji tetsübutsü mapa ka lir.

¹¹Tanü ni ne dang melaba ozüngtem angang. Ni Amor nunger, Kanan nunger, Hit nunger, Periz nunger, Hiv nunger aser Yebus nunger ne jakdang nungi aritoktsü.

¹²Nenok aotsüba lima nisungtem denji tenangzüktepba kecha meyanglutsüla, kechiaser aji oda süra ibaji nenok atema sang tamajung ka asütsü.

¹³ Saka nenoki parnok tenladak, parnok temeshi tongshitem anüka raksatsütsüla, aser parnok Ashera tsüngrem lepzüka yoktsüla.

¹⁴“Nenoki tangar tsüngrem kecha tekülem, kechiaser ni KIBUBA tenükmiba Tsüngrem lir.

¹⁵Ashiko linük nung aliba nisungtem den nai tezüngzükba ka yangluba agi parnok tsüngrem sülen jabujaria anidaktsü, aser parnok tsüngrem dang tepseta tenlatsü, aser kari na jara nenoki tetenlaba shi achitsü;

¹⁶aser nenok jabasotemi parnok jalatem agidaktsütsü, aser parnok jalatemi parnok tsüngrem sülen jabujaria anidaktsü, aser nenok jabasotema parnok sülen jabujaria anidakdaktsütsü.

¹⁷ Nenoki pei asoshi süngyanglu tsüngrem kecha teyanglu.

¹⁸ “Nai piyazü meinokba Amtsük Benjong mungang. Ni ne dang melaba ama Ahib ita nung temeshitetba anogo tenetnü piyazü meinokba amtsük achitsüla, kechiaser iba ita nungji nenok Ijip lima nungi apusoa adok.

¹⁹ “Nu menden nungi mezüng asoba jabaso aser mezüng mepuba nashi aser san nungi tepung ajak kü meyong lir.

²⁰ Saka nenoki mezüng mepuba gado shia san chanu ka agi alangzüktsüla. Nai aji malangzükra, iba tekongji raksatsütsüla. Mezüng asoba jabaso ajak alangzükang aser shinga teka tazüng kü dangi marutsüla.

²¹ “Nenoki anogo trok mapa inyakang, saka anogo tenetnübuba nungjibo anisüngzüktsüla, alu alaba mapang mesüra aluruwa mapang nunga nenoki anizüngzüktsüla.

²² “Kodang alu nung nai prokba nungi metsü arutsü mapang tongdir, nai hapta Benjong mungang, aser küm tatem nung kodang ne metsütem alu nungi bendendir, Terizüngba Benjong mungang.

²³“Küm nung asemben tashi nenok tebur shia ni KIBUBA Israel Tsüngrem dangi arua külemtsüla.

²⁴Nenok jakdang nungi ni kintem kodang aridokdir, nenok litsüji ulushitsü, item benjong asem mapang nungji nenok kü dangi atudang, aser shingaia nenok KIBUBA ner Tsüngrem madang nenok noktaktsü asoshi küm nung asemben tashi aludang linük azüabung masütsü.

²⁵ “Kü tenla tepsetba züji nenoki piyazü enokba amtsük den magütsütsüla; mesüra süia aoba benjong atema tepsetbaji anepdang tashi metoktsütsüla.

²⁶ “Nenok li nung tamasa meyiba rongnung mezüng atangba süngjang nenoki nenok KIBUBA Tsüngrem kidangi bener arung. Nenoki nabong chanu pei tetsüti mamatzü nung memetatsüla.”

²⁷KIBUBAi Mosa dang ashi, “Item o ya nai züluang; kechiaser item o agi ni ne den aser Israel den tezüngzüktepba yangluogo.”

²⁸Idakji Mosa anogo lir aser aonung lir KIBUBA den ali, aser pai amtsük machi mesüra tzü majem. Aser pai lungpak nung tezüngzüktepba ozüng terji zülu.

²⁹ Kodang KIBUBA den jembir külen ozüng lungpak anaji bener Mosa tenem nungi alu, pa tejak sentsüpranga liasü, saka pai aji memetet liasü.

³⁰Aron aser Israel nungertemi kodang Mosa angu pa tejak sentsüpranga liasü, aser parnoki pa anasai aotsü tsübu.

³¹Saka Mosai parnok aja aser Aron o Israel tanishirtem ajak pa dangi ao, aser pai parnok den jembi.

³²Iba sülen Israel nungertem pa anasa sentep, aser Sinai tenem nung KIBUBAi agütsüba Ozüngtemji tashi anga-a benshitsü pai parnok nem agütsü.

³³Mosai parnok den jembizüker külen pai tejak sü ka agi meibang.

³⁴Kodangsa Mosai sentep süki-i KIBUBA den jembitsü odir pai süji luzüka ayu, aser pa adoka pa dang melaba ajak Israel purtem dang ashi,

³⁵parnoki pa tejak sentsüpranga angu. Anungji ano tanaben KIBUBA den jembitsü mai tashi pai pe tejak sü agi meibang.