Read njo ANITET 35 Bible Online

ANITET 35 - njo bible

ANITET 35

¹Mosai Israel nunger ajak sentepdaktsür parnok dang ashi, “Item nenoki benshitsü asoshi KIBUBAi melabaji lir:

² anogo troknü mapa inyakang, saka tenetnübubaji ni KIBUBA atema bendanga meshiteta anisüngzüka amungba anogo lir. Kari iba anogo nungji mapa inyakra pa südaktsütsüla.

³Amungnü nenok talidak kecha nunga mi maputsüla.”

⁴Mosai Israel nunger dang ashi, “Ibai nenok dang KIBUBAi melabaji lir:

⁵KIBUBA dang tenla benang. Nenok nisung shia pei mulungba ama hon, taribi mesüra yongmenyin;

⁶Sü tajung, anüng sentsü, nakrema meremba, tezüng sü, temerem, nabong tezüng agi yangluba sü;

⁷san teküp temerem nung asoba, shiküp tanük, akashia süng,

⁸milen tesangwa asoshi totzü, temezüba totzü, aser teronem tanang asoshi liangmesen;

⁹oniks lung, aser putir temeshi sobutsü aser teku semoktsü nung enokba senti lungtem.

¹⁰“Nenok rongnung temulung agüja tesangra mapa inyaktetertem ajak arua KIBUBAi melaba ama ajak inyakang.

¹¹Iba tekülemdak süki temeibangba aser tarüdangtsü, tongshi-tongnü item tesembangtsü;

¹²tezüngzüktepba Ozüng Süngden, iba süngratem, tenembangtsü aser teyindangba temeiba sü;

¹³langbang, aser iba süngra, aser idakji sendakba oset-tsüset ajak; Tsüngrem nem agütsüba amtsük;

¹⁴tesangwa asoshi milendong; aser iba atema osettsüset, milen aser tesangwa asoshi totzü,

¹⁵sabang aser liangmesen arongdak süngra, temezütsü totzü, teronem tanang asoshi liangmesen, tekülemdak süki kishi teyindangba;

¹⁶tarongba tenla tenladak yongmenyin menja, iba süngra aser tamentakdak, teka shitokba susa aser iba tamentakdak;

¹⁷tekülemdak kilempok nung teyindaktsü yanglubatem, tongshitem aser item tesembangtsü, süki kikümbang nung teyindangba sü;

¹⁸tekülemdak süki temalen teyidaktsü, aser kimalen asoshi teyidaktsü, aser item lisütem.

¹⁹Temeshidak tenzük dang putir sobuba akhüm taket temeshi sobutsü, putir Aron aser pa jabasotem asoshi temeshi sobutsütem.”

²⁰Israel chir telokti Mosa tsüngdang nungi pila-a ao.

²¹Aser sentep süki mapa asoshi, aser iba mapa ajak asoshi, aser temeshi sobutsü asoshi, nisung shiai pei mulung aser tanela agi ajungshiba shiai KIBUBA dangi bener aru.

²²Tebur aser tetsür kwikati mulungsoa liasü, parnok arur sü nung tulokba, tenarong nung anuba küri, tenüng ajenba küri azük aser prangshiba hon tapu ajak bener arua KIBUBA nem bendanga agütsü.

²³Shirnok ket nungsa sü tajung, anüng sentsü, nakrema meremba, mesüra shiküp tajung liasü, parnoki bener aru.

²⁴Ano shirnok ket nungsa taribi mesüra yongmenyin agütsütettsüsa liasü, parnoki itemji KIBUBA dang tenla aser shirnoki akashia süng KIBUBA dang tenlatettsü koka liasü, itemji mapa tapu ajak nung amshitsü koka liasü.

²⁵Tesangra tetsürtemi pei teka agi ayinba ang anüng sentsü, nakrema meremba tezüng sü temerem bener aru.

²⁶Ano tetsürtem shiri pei ket agi ang aintsü meteta liasü parnoki nabong tezüng agi ang yanglu.

²⁷Tanishirtemia putir temeshi sobutsü aser teku semoktsü nung amenoktsü asoshi oniks senti lung bener aru.

²⁸Teronem menemba, milen tesangwa asoshi totzü, temezütsü totzü, teronem asoshi liangmesen;

²⁹Israel chirtemi temulunger tenla KIBUBA dangi bener aru; KIBUBAi Mosa teka agi yanglutsü melaba amato, pei mulungjang nung ajungshiba tebur aser tetsür shiai mapa ajak asoshi benden.

³⁰Idangji Mosai Israel nunger dang ashi, “Yihuda kidong nungi Uri jabaso Hur semchir Bezalel KIBUBAi shimtetogo.

³¹Tsüngremi pei tanela agi paji süngdaktsüogo, aser tangatetba, tangazükba aser mapa tapu ajak inyaktettsü, tangatetba shisatsü agütsüogo.

³²Hon, taribi aser yongmenyin nung tapu balala sangrateta inyaktetba mapa ajak,

³³senti lung akusa-a aser süng agi tapu balala jiteta yanglutsü, aser mapa tapu ajak asoshi,

³⁴KIBUBAi pa aser Dan kidong nungi Ahisamek jabaso Oholiab nem parnok teka mapa tangar dang sayutettsü shisatsü agütsüogo.

³⁵Tesangra mapa balaka inyaktsü, angenteta yangluba mapa balaka, tesangra mapa inyaker aser anüng sentsü, nakrema meremba, jakja-a meremba kümpa sü tanük agi noksa enoka yangluba mapa aser sütaker mapa, mapa tulu aisü inyakertem, item mapa inyaktsü pai parnok nem shisatsü agütsüogo.”