Read njo ANITET 36 Bible Online

ANITET 36 - njo bible

ANITET 36

¹Tang Bezalel, Oholiab aser süng mapashir shir nem KIBUBAi shisatsü aser tangatetba agütsü, aser shiri temeshi süki yanglutsü meteta lir; KIBUBAi melaba ama parnok ajaki yamaji inyaktsüla.

²Idangji Mosai Bezalel, Oholiab aser nübur shir nemsa tetangshi shisatsü KIBUBAi agütsü, aser shirnokisa mulungsoa arua mapa inyakner parnok ajak aja.

³Israel nungeri tekülemdak asoshi agütsüba tenla ajak parnoki Mosa nungi agizük, ano nüburtemi anepdang shia Mosa dangi temulunger tenla mamai bener aru.

⁴Aser tesangra shisatsü akaba nisung ajak, shirnoki tekülemdak mapa ajak inyak, parnok nisung shia pei mapa nungi aru;

⁵aser parnoki Mosa dang ashi, “Mapa inyaktsü KIBUBAi yanglutsü melaba dang nungi kanga agi tali nisungtemi bener arur.”

⁶Anungji tekülemdak asoshi tebur süaka tetsür süaka joko shingaia tenla teben ta tanendak ajak nung Mosai osang sangdong; anungji nüburtemi joko bener maru.

⁷Kechiaser parnok akaba osetji, KIBUBA mapa ajak yanglutsü teperi liasü, aser aji atangji onsara liasü.

⁸Mapa inyaktsü tetangshi nisungtem rongnungi tajungtiba purtem shimteta tekülemdak süki teyindangba sü ter anüng sentsü, nakrema meremba, aser tezüng sü temerem cherubim den mechitepa parnoki yanglu.

⁹Teyindangba sü shiaji metong nung süklep metsür-ti aser lenten nung süklep pezü teyindangba sü ajak tasazük kasa dang liasü.

¹⁰Parnoki item sü punguji külemi ka küma metentep, aser tanüngba pungujia ka küma metentep.

¹¹Sübang manung sütsüngji anüng sentsü agi tepungoktsü keta yanglu, yamaji tanga teyindangba sü nungjia parnoki yanglu.

¹²Teyindangba sü ka nung tepungoktsü tenem, aser tanabuba metentepba tatembanglak nungjia tepungoktsü tenem keta yanglu.

¹³Ano parnoki hon agi jui tenem yanglua sü anaji ka küma metentep. Anungji tekülemdak sükiji ka dang liasü.

¹⁴Tekülemdak süki manung süki asoshi teyindangba sü nabong züng agi pai yanglu: pai teyindangba sü ter-ka yanglu.

¹⁵Teyindangba sü shia metong süklep semer liasü, aser teyindangba sü shia lenten süklep pezü; teyindangba sü ter-kaji tasazük ka dang liasü.

¹⁶Item teyindangba sü pungu pai külemi metentepdaktsü aser teyindangba sü trokji külemi metentepdaktsü.

¹⁷Aser temetentep temaba tatembang nung pai tepungoktsü tenem yanglu, aser tanabuba metentepba sü temaba tatembang nung pai tepungoktsü tenem yanglu.

¹⁸Aser süki külemi ka kümdaktsütsü atema pai yongmen yin agi lakepsen tenem yanglu.

¹⁹Aser süki nembangtsü atema san tepung küp temerem küma aremba pai yanglu, aser temalen nabong küp agi tenembangtsü yanglu.

²⁰Idangji parnoki sükiji akashia süng agi azüklenji yanger.

²¹Süngtsük shia metong nung süklep ter, aser lenten süklep ka ser tesadang liasü.

²²Aser süngtsük shia nungji temetenteptsü asoshi tongshibang ana-na keta liasü. Yamaji tekülemdak süki süngtsük ajakji yanglu.

²³Sentep süki anüolentip terenemtet süngtsük metsü,

²⁴aser iba kübokji taribi agi tesembangtsü lir keter yanglu.

²⁵Süki anüdoklentip len terenemtet süngtsük metsü,

²⁶aser item asoshi taribi agi tesembangtsü keter; süngtsük ka kübok tesembangtsü ana aser tanga süngtsük kübokji tesembangtsü ana.

²⁷Aser tekülemdak süki tesülen anüolen tsütsü pai süngtsük trok yanglu.

²⁸Aser tekülemdak süki tesülen kinük asoshi pai süngtsük ana yanglu.

²⁹Kinüklen süngtsük anaji alilen metentep aser aji azüklen tematiba tashi tua metentepa liasü. Kinüklen süngtsük anajia yamajisa yanglu.

³⁰Anungji süngtsük ti denji taribi tesembangtsü ter-trok, süngtsük shia tesembangtsü ana-na keta liasü.

³¹Parnoki ano akashia süng agi tekülemdak süki tarüdangtsü külen pungu yanglu.

³²Tekülemdak süki külen asoshi pungu, aser tekülemdak süki anüolen asoshi tarüdangtsü pungu yanglu.

³³Süngtsük tiyong nung külen tatem nungi külen tatem tashi tonga tarüdangtsüji yanglu.

³⁴Süngtsük nungji hon yanglok, aser hon tayitemji tarüdangtsü sottsü asoshi yanglu, koba daka hon yanglok.

³⁵Teyindangba süji anüng sentsü, nakrema meremba, aser tezüng sü temerem agi cherubim dena mechitepa sangra-a pai yanglu.

³⁶Akashia süng agi tongshi pezü yanglua tema nungji hon yanglok, aser aji hon jui agi kepeta yanglu. Item asoshiji taribi tesembangtsü ketdaktsü.

³⁷Süki kiküm asoshi tetongdangtsü atema anüng sentsü, nakrema meremba, tezüng sü temerem aser sü tajung agi mechitepa yanglu.

³⁸Ibaji atema hon tongshi pungu jui tena yanglu, aser iba naiba temalen tongshibang nungji hon yangloktsü, aser iba tesembangtsüji yongmenyin liasü.