Read njo ANITET 37 Bible Online

ANITET 37 - njo bible

ANITET 37

¹Tang Bezaleli Tezüngzüktepba Ozüng Süngdenji akashia süng agi yanglu. Ibaji metong nung süklep ana ser tesadang, lenten süklep ka ser tesadang aser touchi nung süklep ka ser tesadang liasü.

²Pai iba süngden tema aser telung nungji hon temeja yanglok, aser aji meketa hon agi züdang.

³Iba tetsüng pezü nungji pai hon tayi pezü ketdaktsü, külen tayi ana aser külen ana.

⁴Pai akashia süng agi süngra yanglu aser idakji hon yanglok,

⁵aser süngden tetsünglen süngra tayi nungji enoktsü.

⁶Ano hon temeja agi pai tenembangtsü yanglu; koba metong nung süklep ana aser tesadang, lenten nung süklep ka ser tesadang liasü.

⁷Taochi menden tatembang anatsülen hon agi atsüngba cherubim ana pai yanglu.

⁸Taochi menden tatem külen cherub ka aser külen cherub ka. Aser aji taochi menden denji ka küma yanglu.

⁹Aser cherubimji parnok tashikang temaleni sarar, parnok tashikang agi taochi menden awabanger, tejak jitepa, cherubim tejakji taochi menden tsütsü shia liasü.

¹⁰Pai akashia süng agi langbang ka metong nung süklep ana, lenten süklep ka, aser touchi nung süklep ka ser tesadang yanglu;

¹¹aser aji hon temeja agi yangbang aser ibaji meketa hon agi züdang.

¹²Parnoki ano ibaji meketa tekabu ka lema tebang keta yanglu, aser ajia hon agi züdang.

¹³Aser iba asoshi hon tayi pezü ketdaktsü, aji tetsüng pezü nung kinük pezü aliba nung tayi enok.

¹⁴Langbangji abentsü atema süngra atalokdak tatembanglen atsünga tayitemji enoka liasü.

¹⁵Pai akashia langbangji abentsü asoshi süng agi süngraji yanglu aser idakji hon yanglok.

¹⁶Langbang manung ayutsü asoshi hon temeja agi yangluba su, marok, aser tezüoktsü, marok aser susa ajak yanglu.

¹⁷Milendongji pai hon temeja agi yanglu: milendong iba temtsüng aser tetong pai menokteta yanglu; iba maroktem, temechitem, aser narotemji iba den ka dang liasü.

¹⁸Iba nungi kongsang trok milendong atalokdak, tip külen nung kongsang asem, aser ano tip külen kongsang asem adoka liasü.

¹⁹Almond naro apungba ama yangluba kongsang ka nung marok asem, temechi ka aser naro ka; kongsang ka nungjia almond naro apungba ama yangluba marok asem, temechi ka aser naro ka: yamaji milendong nung jagi kongsang trok aobaji liasü.

²⁰Aser milendong nungji marok pezü almond naro apungba ama, temechitem aser narotem yanglua liasü.

²¹Milendong atalokdak sangshia aoba kübok temechi ka mezüngbuba kongsang ana kübok, tanabuba temechiji tanabuba kongsang kübok, aser tasembuba temechiji tasembuba kongsang kübok; kongsang trok kübokji sangshia liasü.

²²Temechi, kongsangtem, aser milendong atalokdak, ajakji hon temeja agi atsüngba liasü.

²³Aser pai milen tenet aser iba angsü aser misü mejeptokba, hon temeja agi yanglu.

²⁴Item oset ajak aser milendong atalokdak asoshi aser susaji dena hon temeja seret semer-pezü agi yanglu.

²⁵Parnoki akashia süng agi liangmesen arongba sabang ka lenten metong ajak tasazük kasa: metong nung süklep ka, lenten süklep ka aser touchi nung süklep ana yanglu. Tezütemji iba denji ka dang liasü.

²⁶Iba temalen aser tip meketa aser tezütemji hon temeja agi yanglu aser ibaji meketa hon agi züdang.

²⁷Aser aji abentsü asoshi iba tip anatsülenji, süng tatem sottsü asoshi hon agi züdanga yangluba kübok hon tayi ana yanglu.

²⁸Pai süngraji akashia süng agi yanglu, aser idakji hon yanglok.

²⁹Aser temezütsü asoshi temeshi totzü, teronem menemtsü atema teronem tanang aser liangmesen teronem menemtsü parnoki yanglu.