Read njo ANITET 38 Bible Online

ANITET 38 - njo bible

ANITET 38

¹Tarongba tenla sabangji parnoki akashia süng agi yanglu. Ibai kinük pezüsülen kasasa metong nung süklep pungu, lenten süklep pungu aser touchi nung süklep asem yanglu.

²Kinük pezüsülenji tezü ka ka yanglu, aser aji sabang denji ka dang küma yanglu, aser parnoki idakji yongmenyin yanglok.

³Tenladak amshiba oset-tsüset, chipo, tateptsü su susa, shijok aser mijepru, item ajakji yongmenyin agi yanglu.

⁴Tenladak asoshi yongmenyin agi menja ka satem telunglen tenladak tom ka tashi parnoki yanglu.

⁵Aser süngraji enoktsü asoshi kinük pezüsülen tayi pezü yanglok,

⁶Pai süngraji akashia süng agi yanglu, aser idakji yongmenyin yanglok.

⁷Aser taputsü aji tenladak kinük pezüsülen tayi nungji enoktsü. Parnoki aji süngtsük agi küroka yanglu.

⁸Sentep süki kishi züngdang tenzükba tetsürtem asoshi tanüdangtsü, yongmenyin agi pai merükmejutsü susa aser tamentakdak yanglu.

⁹Pai kima yanglu, anüolentiptsütsü kima yangluba nungji temechiba kümpa sü tajung, süklep noklang ka mesanga ayu;

¹⁰item tongshi metsü, aser item tesembangtsü metsü, yongmenyin agi yangluba; tongshi jui aser tenaibaji taribi liasü.

¹¹Aser anüdoklentiptsütsü süklep noklang ka, tongshi metsü, aser tesembangtsü metsü, yongmenyin agi; tongshi jui aser tenaidangbaji taribi agi yanglu.

¹²Anüolen tsütsü teyindangba süji süklep tenem, tongshi ter, aser tesembangtsü ter: tongshi, jui aser tenaibaji taribi agi yanglu.

¹³Anüdoklen kong kikümbang liasü aji süklep tenem liasü.

¹⁴Kikümbang külen tsütsü teyindangba süji süklep terpungu, tongshi asem, aser tesembangtsü asem,

¹⁵aser kikümbang külen teyindangba süji süklep terpungu, tongshi asem aser tesembangtsü asem.

¹⁶Kima teyindangba sü ajakji temechiba sü tajung agi yanglu.

¹⁷Tongshi tesembangtsütemji yongmenyin agi yanglu, saka jui, tenaidangba, aser temalen tongshibangji taribi agi yanglu. Kimalen tongshi ajakji taribi agi naitepa liasü.

¹⁸Kima kikümbang asoshi tetongdangbaji noksa enoka yangluba anüng sentsü, nakrema meremba tezüng sü temerem aser temechiba kümpa sü tajung agi tobur junga yanglu. Ibaji metong nung süklep metsü, aser kima teyindangba denji liro medema touchi nung süklep pungu liasü.

¹⁹Idakji yongmenyin tongshi pezü aser tesembangtsü asoshi pezü yanglua liasü. Item jui taribi agi aser item temalen iba tongshibang aser tenaidangbaji taribi liasü.

²⁰Tekülemdak süki tasongtsü ajak aser kima temeketji yongmenyin agi yanglu.

²¹Tekülemdak süki asoshi osettem bendenba ya lir, oda kuli ayuba tekülemdak, koba Mosai Levi nungeri inyaktsü mapa ta mela-a Aron putir jabaso Ithamar ketdangsüa inyakdaktsü.

²²Aser Yihuda kidong Hur semchir aji Uri jabaso Bezaleli KIBUBAi Mosa dang melaba ajak inyak.

²³Aser pa den Dan kidong nungi Ahisamak jabaso Oholiabi lung nung angenpoka züluba, aser tesangra mapa inyaker ka noksa enoka anüng sentsü nakrema meremba, jakja-a meremba aser kümpa sü tanük agi inyaka liasü.

²⁴Tekülemdak jungjunga renemdang hon agiba ajak agi seret noklang ti aser neter, aser shekel noklang tenet ser semer, aji temeshidak seret odangba agi liasü.

²⁵ Aser yongsük nung aliba telok nungi taribi seret meyirijang asem, aser shekel meyi ka noklang tenet ser neter pungu, aji temeshidak seret odangba agi liasü.

²⁶Nisung shia beka ka ka, aji temeshidak aliba agi shekel tesadang ka, aser küm metsü nungi temalen tebur ajak agi meyi noklang trok ser asem, noklang pungu ser tenem.

²⁷Aser taribi seret meyirijang asemji temeshidak tesembangtsü asoshi aser tetongdangba tesembangtsü asoshi liasü; aser taribi seret meyi asem asoshi tesembangba noklang ka, tesembangtsü shia seret semermer.

²⁸Aser tanüngba taribi shekel meyi ka noklang tenet ser neter pungu jagi tongshitem jui, temalen tongshibang nung yangloka tenaidangtsü pai yanglu.

²⁹Aser tenla bendenba yongmenyin ajak agi seret meyi ka ser noklang ka, aser shekel meyi ana ser noklang pezü liasü.

³⁰Aser iba jagi sentep süki nung tesembangtsü, aser yongmenyin agi yangluba tenladak, aser iba asoshi yongmenyin temeja, aser tenladak osettsüset ajak,

³¹aser kima nung tesembangtsü, aser tekülemdak süki tasongtsü, aser kima meketa tasongtsü ajak yanglu.