Read njo ANITET 39 Bible Online

ANITET 39 - njo bible

ANITET 39

¹KIBUBAi Mosa dang melaba ama parnoki Aron asoshi temeshi sobutsü anüng sentsü, nakrema meremba, aser tezüng zü temerem agi temeshidak tenzükdang asemtsü asoshi putir sobutsü parnoki yanglu.

²Pai putir temeshi sobutsüji hon, anüng sentsü, nakrema meremba, tezüng sü temerem aser temechiba kümpa sü tajung agi yanglu.

³Aser parnoki honji apu-apua tapak tapak küma yanglu, aser noksa yanglurtemi anüng sentsü aser nakrema meremba sentsü aser jakja-a meremba sentsü agi inyaktsü atema yinzü küma aji mejepsa.

⁴Iba asoshi tapubang nung sepoktsü atema külemi metentepa parnoki yanglu; aji tatembang anatsülen külemi metentepa liasü.

⁵Teberem nung naiba süjia iba denji mesüktepa hon, anüng sentsü, nakrema meremba, aser tezüng sü temerem agi yanglu, aji KIBUBAi Mosa dang melaba amato yanglu.

⁶Parnoki oniks lungji hon kepdang manung amenlok, aser idakji angenpoka Israel chirtem tenüng zülua ayu.

⁷KIBUBAi Mosa dang melaba ama, Israel chirtem atema tebilemtettsü senti lung asütsü asoshi putir sobutsü tapubang nungji sendak.

⁸Pai teku semoktsüji, putir temeshi sobutsü amaji, tesangra mapa agi inyak; aji hon, anüng sentsü, nakrema meremba, jakja-a meremba aser temechiba kümpa sü tajung agi yanglu.

⁹Aji tip pezüsülen kasa liasü; teku semoktsüji parnoki anasü yanglu, metong nung aka ka, aser lenten nung aka ka, aji anasü liasü.

¹⁰Iba manung parnoki lung taren pezü amenlok: mezüngbuba taren nungji sardins, topaz aser karbankel lung,

¹¹tanabuba taren nungji emerald, sapfir, aser tongbang lung;

¹²tasembuba taren nungji jacint, aget, aser amethis;

¹³pezübuba taren nungji beryl, oniks, aser jasper lung. Itemji hon keptang nungji amenloka liasü.

¹⁴Lung terana nungji lung shia dakji Israel chirtem tenüng ka ka angenpoka yanglu, aser aji Israel kidong terana asoshi temaitsü liasü.

¹⁵Teku semoktsü manung parnoki lisü ama yinzü hon temeja agi mesentepa yanglu.

¹⁶Aser parnoki hon keptang ana, hon tayi ana, teku semoktsü tatembang ana nungji sentaka yanglu.

¹⁷Aser temesentepba hon yinzü anaji parnoki küri ana manung, teku semoktsü tatem külen sentak.

¹⁸Aser temesentepba yinzü külen aliba tatembang anaji, parnoki hon keptang ana nungji sentak, aser aji tapubang nung sepokba putir temeshi sobutsü ajaklen sentaktsü.

¹⁹Aser parnoki hon tayi ana yanglu, aser putir temeshi telung sobutsü temtsünglen tatembanglak teku semoktsü tatembang ana manung aji sentak.

²⁰Parnoki ano hon tayi ana yanglu, aser aji putir temeshi sobutsü tejaklen tapubang nung sepokba ana dakji sendak, aji telunglen temetenlokdak anasa sangra-a yangluba temechiba sü tajung agi tenaibaji yanglu.

²¹KIBUBAi Mosa dang melaba ama teku semoktsüji sangra-a yangluba tenaiba manung ataloka alitsü, aser aji putir temeshi sobutsüji seplasepshia mesangzütsü asoshi teku semoktsü tayiji putir temeshi sobutsü tayi dak anüng sentsü angsü agi sendak.

²²Putir temeshi sobutsü ajakji anüng sentsü agi yanglua liasü.

²³Tekolak asoshi tapok apabaji meshimatsü atema sübangji meketa arütep.

²⁴Teperem sü temalen jarem mesüka anüng sentsü, nakrema meremba, tezüng sü temerem, aser temechiba kümpa sü agi meketa yanglu.

²⁵Parnoki hon temeja sangshiji teperem sü meketa jarem narotem mesüka tetsüngda nungji sentak.

²⁶Sangshi ka, jarem naro ka, sangshi ka, jarem naro ka ta, KIBUBAi Mosa dang ashiba ama, teperem sü meketa tenzükba mapa atema yanglu.

²⁷Parnoki Aron aser pa jabasotem asoshi tezüng sü tajung agi semoksü yanglu,

²⁸aser kolakjen, korang, aser tetsüng semoktsü, temechiba kümpa sü,

²⁹sü tajung agi aser peremlen agi, anüng sentsü, nakrema meremba, tezüng sü temerem agi noksa yangluri yangluba ama tobur junga yanglu, aji KIBUBAi Mosa dang tuyuba ama inyak.

³⁰Parnoki hon temeja agi temeshi korang yanglu aser idakji KIBUBA ASOSHI MESHITETBA ta angenpoka zülu.

³¹Aser iba dakji parnoki temechiba anüng sentsü agi kolakjen manung sendaktsü asoshi yanglu; aji KIBUBAi Mosa dang melaba ama liasü.

³²Yamaji sentep süki tekülemdak mapa ajakji renem. Israel nungeri KIBUBAi Mosa dang melaba ajakji parnoki inyak.

³³Parnoki tekülemdak süki asoshi oset-tsüset ajak: jui, süngtsük, terenemtet tarüdangtsü, tongshi aser tesembangtsü, item ajakji Mosa dangi bener aru,

³⁴aser san tepung küp temerem küma aremba temeyibangtsü shiküp tajung, teyindangba sü;

³⁵Ozüng Süngden aser taochi menden apuba süngra,

³⁶langbang aser idakji amshiba osettsüset ajak Tsüngrem tsüngdang ayuba amtsük, milen, aser osettsüset ajak, aser milen asoshi totzü;

³⁷hon temeja milendong, iba milentem, oda tatongi shia ayutsüba milentema, aser iba osettsüset ajak, aser tesangwa asoshi totzü;

³⁸aser hon agi yangluba tenladak, aser temezütsü totzü, aser teronem menemtsü tanang, aser süki kishi asoshi tetongdangtsü;

³⁹yongmen yin agi yangluba tenladak, aser iba nung yongmenyin agi menja yangluba, iba tema süngra, aser iba atema oset-tsüset ajak, aser merükmejutsü susa aser iba tamentakdak;

⁴⁰kima teyindangbatem, iba atema tongshitem, aser iba tesembangtsü, aser kima kiküm tetongdangtsü aser iba lisütem, aser iba tasongtsü, aser sentep süki asoshi tekülemdak süki mapa atema osettsüset ajak;

⁴¹temeshidak tenzüktsü asoshi süoshi tajung yangluba, aser putir mapa tenzüktsü asoshi Aron putir asoshi süoshi aser par jabasotem asoshi süoshitem.

⁴²KIBUBAi Mosa dang melaba ama Israel chirtemi mapa ajak inyak.

⁴³Aser Mosai mapa ajakji angu, aser ajiang, parnoki aji renem; KIBUBAi Mosa dang melaba ama, yamaji parnoki inyak aser Mosai parnok moatsü.