Read njo ANITET 4 Bible Online

ANITET 4 - njo bible

ANITET 4

¹Idangji Mosai KIBUBA dang langzü, “Saka nüburtemi kü dak mamangi KIBUBA ne dangi jungkai madok ta shira koda?”

²KIBUBAi pa dang asüngdang, “Ne ket nung alibaji kechi?” Pai langzü, “Mechi ka.”

³KIBUBAi ashi, “Aji ali nung tsükdakjang.” Kodang Mosai aji ali nung tsükdaktsü, aji agi per ka aküm; aser pai iba tsüngdang nungi ajen.

⁴Idangji KIBUBAi Mosa dang ashi, “Ne teka songtoka iba teben nungji ametang.” Mosai pa teka songtoka per dakji amet aser aji agi mechi ka aküm.

⁵KIBUBAi ashi, “Israel nungertem dang nenok tsürabur Tsüngrem, Abraham, Isak aser Yakob Tsüngrem ne dangi jungkai adok ta parnoki amangtsü asoshi yamaji inyakang.”

⁶Ano KIBUBAi Mosa den tanaben jembi, “Ne teka süpok nung yuang.” Mosai yamaji inyak; aser kodang pai pei teka adok pa teka zütsüra agi rüjep ama temesüng aküm.

⁷Idangji KIBUBAi ashi, “Ano ne süpok nung ne teka yuang.” Pai yamaji inyak, aser kodang pa teka adok, akhi ama aji tanaben aneber liasü.

⁸KIBUBAi ashi, “Parnoki mezüngbuba sayatenya dakji mamangra, mesüra temulung magütsüra, parnoki tanabubajibosa amangtsü.

⁹Aser parnoki item sayatenya ana idakji mamangi nai ashibaji magizükra, idangji nai Nile ayong nungi tzü tateta ali nung shilokjang, aser tzü jagi azü akümtsü.”

¹⁰Saka Mosai KIBUBA dang ashi, “Masü, KIBUBA nibo teyokma. Kechiaser ni akhidang nungi aser nai ne tenzüker den jembir külena ni o nung tsüngro masong; aser ni o jembitsü temeli mekiki.”

¹¹KIBUBAi pa dang ashi, “Nisung bang shibai yanglu? Shibai nisung temeli tsükdaktsür aser tenarong jakdaktsür? Shibai parnok nem ngudaktsür mesüra tenük pokdaktsür? Aji ni KIBUBAi inyaker masü no?

¹²Anungji tang oang, aser o jembitsü asoshi ni yaritsü, aser nai kechi jembitsü aji ne dang sayutsü.”

¹³Saka Mosai langzü, “Masü KIBUBA, yimlibilema tangar kar yokangma ta ni mepishir.”

¹⁴Idangji Mosa anema KIBUBA ain adok, aser pai ashi, “Levi kidong nungi nedi Aron mali no? Pai junga jembiteter ta ni metet. Tang pa ne den ajuruteptsü arudar, aser kodang pai na ngudir pa mulung pela-a alitsü.

¹⁵Nai pa den jembitsü, aser otemji pa tebang nung enoktsütsü, aser ni nenaprong yaritsü aser nenoki kechi inyaktsü aji ni sayutsü.

¹⁶Aser nübur dang na asoshi pa o tongtar asütsü, aser pa na asoshi tebang ama aser na pa asoshi Tsüngrem ama alitsüsa adoktsü.

¹⁷Saka mechi ne teka nung amtsüla aser iba jagi nai sayatenya temaitsütem inyaktsüla.”

¹⁸Idangji Mosai toko Yethro dangi shilang aser pa dang ashi, “Ijip lima nung kü adianutem ano taküm ali asü mali meyipa oa reprangdangtsü ni odakjang ta mepishir.” Yethroi Mosa dang ashi, “Junga oang.”

¹⁹Ano Mosa Midian lima nung alidang KIBUBAi pa dang ashi, “Ijipi meyipa oang, kechiaser na tepsettsü bushirtem to ajak süogo.”

²⁰Anungji Mosai pei kinungtsü aser jabasotem gado nung mendaktsü, aser pa ket nung Tsüngrem mechiji amer Ijip limai ao.

²¹Ano KIBUBAi Mosa dang ashi, “Kodang na Ijip limai meyipa odir, ni ne nem tashi agütsüba ama, Ijip chuba Farao madang sayatenya temaitsü ajak sayuang. Saka nüburtem modaktsütsü asoshi ni pa temulung meranga kümdaktsütsü.

²²Idangji nai Farao dang yamai ashitsüla, ‘Ni KIBUBAi ashir, Israel kü mezüng chir.’

²³Ni ne dang shiogo, Kü chiri ni tenzüktsü aser külemtsü asoshi odakjang; saka nai pa modaktsüra ni ne mezüng jabaso tepsettsü.”

²⁴Parnok aodang lenmang nung tanendak KIBUBAi Mosa ajuru aser pa tepsettsü bushi.

²⁵Idangji Mosa kinungtsü Zipporai lung techira ka bena arua pei jabaso teküp mejeptoktsü, aser Mosa tsüngdang tokja ashi, “Atangji ni atema azü agi kiyimsangji na lir.”

²⁶Anungji KIBUBAi Mosa odang toktsü. Idangji mejeptoktsüba yong lai ashi, “Azü agi sosemba kiyimsang na lir.”

²⁷KIBUBAi Aron dang ashi, “Mosa den ajuruteptsü na lisem lima jagi oang.” Aser pai oa Tsüngrem tenem nung Mosa ajurua kanga pelatep.

²⁸Aser KIBUBAi pa dang ashiba o ajak, aser pa sayatenya temaitsü kechisa inyaktsü KIBUBAi mela, item ajakji pai Aron dang ashi.

²⁹Idangji Mosa o Aron na oa Israel tambur ajak külemi sentepdaktsü.

³⁰Aser KIBUBAi Mosa dang ashiba o ajak Aroni parnok dang ashi. Ano Mosai parnok tsüngdang temaitsütemji inyaka sayu.

³¹Aser nüburtemi amang, aser kodang parnok KIBUBAi semdangogo aser parnok rishikangshi tia nguogo ta angashi, idangji parnoki apudaker külem.