Read njo ANITET 6 Bible Online

ANITET 6 - njo bible

ANITET 6

¹KIBUBAi Mosa dang ashi, “Tang ni Farao dang kechi inyaktsü ali aji nai angutsü. Kechiaser kü tashi tait teka agiang pai kü nüburtem yoktsü. Hau, tashi-tait teka agi pai pei linük nungi parnok aridoktsü.”

² Ano Tsüngremi Mosa dang ashi, “Ni KIBUBAji lir.

³Ni Abraham, Isak aser Yakob dangi Ajak Takoksang Tsüngrem ama jungkai adok, saka parnok dang kü temeshi tenüng KIBUBA ta mejadaktsüi liasü.

⁴Kanan lima kong parnok aener ama liasü, aji parnok nem agütsütsü ni parnok den kü tezüngzüktepba yangluogo.

⁵Iba dak alia Ijip nungeri alar tia nung ayuba Israel chirtemi anüngba ola ni angashiogo, aser ni kü tezüngzüktepba bilemtetogo.

⁶“Anungji Israel chirtem dang shiang, ‘Ni KIBUBA lir; ni nenok Ijip nunger alar tia nungi anitettsü, aser parnok lar akümba tia nungi ni nenok kümzüktsü. Ni kü teka songtoka aser obendangba tulu agi nenok alangzüktsü.

⁷Nenok kü nübur asütsü aser ni nenok Tsüngrem asütsü. Aser kodang ni nenok Ijip alar tia nungi anitetdir idangji nenoki ni KIBUBA, nenok Tsüngrem ta metettsü.

⁸Abraham, Isak aser Yakob nem koba alinük agütsütsü asoshi ne teka mekanga azüngashiogo, aji agi ni nenok anir arutsü, aser aji nenok senmang asütsü asoshi ni agütsütsü. Ni KIBUBA lir.’ ”

⁹Mosai item o ajakji Israel nungertem dang ashi, saka parnok temulung zürep aser ala-ashi ulura nungji parnoki pa dang manga.

¹⁰Idangji KIBUBAi Mosa dang ashi,

¹¹“Farao dangi oang, aser pai Israel nungertem par lima nungi odakjang ta shiang.”

¹²Saka Mosai langzü, “Israel nungertemia kü dang manga nung, ni ama temeli mekikir ka dang Faraoi koda angatsü?”

¹³Idangji KIBUBAi Mosa aser Aron dang ashi, “Israel nungertemji Ijip lima nungi anitettsü ni melaogo ta Israel nungertem aser Ijip chuba Farao dang shiang.”

¹⁴Item ya parnok kibongtem tongtipur lir: Yakob mezüng asoba jabaso Reuben chirtem: Hannok, Dallu, Hezron aser Karmi. Ya Reuben kinungertem.

¹⁵Simeon chirtem, Yemuel, Yamin, Chad, Yakin, Zohar aser Kanantsüri asoba Shaul, aji Simeon kinungertem.

¹⁶ Levi chirtem parnok putu balala shia nung tenüng itemi: Gershon, Kohat, aser Merari. Levi arishi küm noklang ka ser semer tenet liasü.

¹⁷Gershon chirtem: Labni aser Shimei, aji parnok kidongren.

¹⁸Kohat chirtem: Amram, Izhar, Gebron aser Uzziel. Kohat arishi küm noklang ka ser semer asem liasü.

¹⁹Merari chirtem: Mahli aser Mushi. Itemji Levi kidong dak jakzükba kidongtem lir.

²⁰Amrami pa kinungtsü asütsü pa tebu tenu Yokebed agi aser lai pa nem Aron aser Mosa sotsü. Amram arishi küm noklang ka ser semer tenet liasü.

²¹Izher chirtem: Kora, Nefeg aser Zikni.

²²Uzziel chirtem: Mesheal, Elzafan aser Sithri.

²³Aroni pei Aminadab jala Nashon tenu Elisheba kinungtsü asütsü asoshi agi, aser lai pa nem Nadab, Abihu, Eleazer aser Ithamar sotsü.

²⁴Kora chirtem: Assir, Elkana aser Abiasaf. Parnokji Kora nungi jakzükba kidongtem lir.

²⁵Aroner chir Eleazari Putiel jalatem nungi kinungtsü ka agi, aser lai pa nem Finehas sotsü. Item ya Levi kidongtem nungi tongtipurtem lir.

²⁶Ano Aron aser Mosa dang KIBUBAi ashi, “Israel nungertem Ijip lima nungi anir oadokang.”

²⁷Aser parnoki Ijip chuba Farao dang Israel chirtem alar tia nungi anir odakjang ta Mosa o Aron nati ashi.

²⁸Kodang KIBUBAi Mosa den Ijip lima nung jembi,

²⁹pai ashi, “Ni KIBUBA lir, ni ne dang ashiba ajak nai Ijip chuba Farao dang ashitsüla.”

³⁰Saka Mosai KIBUBA dang langzü, “Ni o jembi mashi nung Faraoi kodaser kü dang angatsü?”