Read njo ANITET 7 Bible Online

ANITET 7 - njo bible

ANITET 7

¹Idangji KIBUBAi Mosa dang ashi, “Ni na Farao madang Tsüngrem ama aser nedi Aron na asoshi ainkar asütsü.

²Ni ne dang melaba ajak nai jembitsü, aser nedi Aroni Israel nungertem par linük nungi odaktsütsü asoshi Farao den jembitsü.

³ Aser ni sayatenya aser temaitsütem jenti Ijip lima nung züindaktsütsü asoshi Farao temulung meranga kümdaktsütsü,

⁴pai ne dang mangatsü. Idangji ni kü teka mekanga obendangba tulu agi ni Ijip dak kongshitsü, aser ni kü nüburtem anitettsü.

⁵Kodang Ijip anema kü teka mekangdir, aser Israel nungertem Ijip lima nungi anitetdir idangji parnoki ni KIBUBA ta metettsü.

⁶Yamaji KIBUBAi melaba ama Mosa o Aron nati inyak.

⁷Parnoki Farao den jembidang Mosa arishi küm tir, aser Aron arishi küm tir asem liasü.”

⁸KIBUBAi Mosa o Aron na dang ashi,

⁹“Sayatenya ka ajanga nai kuli sang ta Faraoi ne dang shira, Aron dang shiang, ne mechiji Farao jakdang tsükdakjang, aser aji agi per ka akümtsü.”

¹⁰Anungji Mosa o Aron nati Farao dangi oa KIBUBAi ashiba ama inyak. Aroni Farao aser pa yimsüsürtem jakdang pa mechiji tsükdaktsü; aser aji agi per ka aküm.

¹¹Idangji Faraoi Ijip tashi temeteter, temezünger aser ain sayurtem aja, aser parnokia pei miim tashi agi yamaji inyaktet.

¹²Parnokia pei mechi tsükdaktsü, aser aji agi per aküm. Saka Aron mechi jagi itemji meyokadok.

¹³Aji saka Farao mulung meranga aküm, oda KIBUBAi Mosa o Aron na dang ashiba ama pai tena danga manga.

¹⁴KIBUBAi Mosa dang ashi, “Farao temulung meranga lir, aser pai nüburtem odaktsütsü memulunger.

¹⁵Anungji anepdang Farao ayongi aodang pa den ajurutepang. Ne mechi koba agi per aküm, aji amer Nile ayongküm nung pa ata-a liang.

¹⁶Aser nai pa dang shiang, KIBUBA, Ibri nunger Tsüngremi ne dang o ya ashitsü ni yok. Lisem lima lenji oagi parnoki ni külemtsü asoshi parnok yokang. Saka tang tonga nai mangar.

¹⁷Yamai KIBUBAi ashir: Iba yagi nai ni KIBUBA ta metettsü. Reprangang kü ket nung aliba mechi yagi Nile ayong dak azüktsü, aser tzüji azü akümtsü.

¹⁸Ayong nung aliba ango asütsü aser tzü nungji teshinem menemtsü; aser Ijip nungeri ayong nungi tzü nungji tateta ajemtsü makoktsü.”

¹⁹Aser KIBUBAi Mosa dang ashi, “Aron dang shiang, ne mechi am-ang aser azü kümdaktsütsü atema ne teka Ijip tzü, ayongtem manung aser item tzümesü aser tzütu manung ne teka songtokang, aser Ijip lima ajak nung, süng aser lung susa nung azü alitsü.”

²⁰KIBUBAi melaba amaji Mosa o Aron nati inyak. Farao aser pa tenzükertem jakdang Aroni pa mechi mekang aser Nile ayong dak azük, aser tzüji azü aküm.

²¹Nile ayong nung aliba tzüji mejemtet. Aser Ijip lima ajak nung azü liasü.

²²Saka Ijip nunger temezüngertemia parnok miim ain ajanga kasaji inyak, anungji Farao mulung meranga aküm; aser KIBUBAi ashiba ama pai Mosa o Aron na dang manga.

²³Faraoi pei kidangi meyipa ao aser iba indang kecha süoki ia mebilem.

²⁴Aser Ijip nungeri Nile ayongji meketa tajemtsü tzü bushia ali atu, kechiaser parnoki ayong tzüji mejemtet.

²⁵KIBUBAi Nile ayong dak züker anogo tenet abensa.