Read njo ANITET 8 Bible Online

ANITET 8 - njo bible

ANITET 8

¹Idangji KIBUBAi Mosa dang ashi, “Farao dangi oa KIBUBAi yamai ashir ta shiang, ‘Ni külemtsü asoshi kü nüburtem yokangma.

²Saka nai parnok modaktsüra, ni ner lima ajak allu wara agi tongdaktsütsü.

³Aser Nile ayongji allu agi asüngtsü. Parnok ner kidangi atutsü aser ne yipten taktangi aittsü, aser ner yipten manung aser ne yimsüsürtem kidangi aser ne nübur madak, ne am awangba su nung, aser susa telungi aittsü.

⁴Allutem jagi na, ne nübur aser ne yimsüsürtem madaki aya-a atutsü.’ ”

⁵Idangji KIBUBAi Mosa dang ashi, “Aron dang shiang, Ayongtem, tzümesütem, tzütutem madak mechiji amer ne teka songtokang, aser Ijip lima ajaklen allu adokdakjang.”

⁶Anungji Aroni Ijip tzü ajak madak pei teka songtok, aser Ijip lima ajak allu agi asüng.

⁷Saka temezüngertemia parnok miim tashi amshia Ijip nung allu adokdaktsü.

⁸Idangji Faraoi Mosa o Aron na aja aser ashi, “Ni aser ozü nübur nungi allu samadaktsütsü atema KIBUBA dang mepishiang, aser ni nenok KIBUBA dang tenlatsü odaktsüdi.”

⁹Aser Mosai Farao dang ashi, “Nai yimlibilema shiangma: na aser ne kidang nungi allu samadaktsür ayong nungji dang liang ta ni na, ne yimsüsür, aser ne nübur asoshi kodang mepishitsütsü?”

¹⁰Faraoi ashi, “Asüng ni asoshi mepishijang.” Mosai ashi, “Nai ashiba ama ni inyaktsü, idangji KIBUBA ozü Tsüngrem dak alema tangar tsüngrem shinga mali ta nai metettsü.

¹¹Nile ayong nung aliba dak alaka na, ne yimsüsürtem aser nüburtem nungi allu samatsü.”

¹²Anungji Mosa o Aron na Farao nungi pilar külen Mosai KIBUBA dang Farao aser par nüburtem anema adokdaktsüba allutemji samatsü atema mepishitsü.

¹³Aser Mosai mepishiba ama KIBUBAi inyak, kidang, kimalen aser alu nung aliba allutem ajak asü.

¹⁴Anungji Ijip nungeri itemji telong telong küma benden aser linük ajaklen teshinem menem.

¹⁵Kodang allu asüba ajanga Farao anisüngzük angu, pa ano tanaben temulung meranga aküm, aser KIBUBAi ashiba amato pai Mosa o Aron na dang manga.

¹⁶Anungji KIBUBAi Mosa dang ashi, “Aron dang shiang, Ijip lima ajak nung azüpong poktetdaktsütsü ne mechi mekangang, aser ali nung auyi dakji zükang.”

¹⁷Aroni ali auyi dakji pa mechi jagi azük aser Ijip lima ajak nung auyi jagi azüpong kümer nisung aser shiruru ajak daki atu.

¹⁸Aser temezüngertemia pei miim tashi ajanga azüpong adokdaktsütsü merang, saka parnoki tamakok angu. Anungji nisung aser shirurutem madak azüpongji liasü.

¹⁹Idangji temezüngertemi Farao dang ashi, “Ibai Tsüngremi inyakba mapa lir” Saka Farao temulung meranga aküm, aser KIBUBAi ashiba ama pai Mosa o Aron na dang manga.

²⁰Idangji KIBUBAi Mosa dang ashi, “Anepdang yakta saker Farao ayongi aruba ata-a liang aser pa dang shiang, ‘KIBUBAi yamai ashir, kü nüburtemi ni külemtsü yokang.

²¹Nai kü nüburtem meyokra ni ne dangi, ne yimsüsürtem, ne nüburtem aser ner kidangi manga telok yoktsü. Manga jagi Ijip nunger ki aser parnok alidak moapu ajak asüngtsü.

²²Saka alima nung niji KIBUBA ta metettsü atema panüji kü nübur alidak Goshen lima ni balaka sadanga ayutsü aser yangji manga melidaktsütsü.

²³Yamaji kü nübur o ne nübur na tsüngda nung ni telemsa[3] ayutsü aser asüng iba sayatenya mapaji ataloktsü.’

²⁴Aser KIBUBAi yamaji inyak aser manga telok tulu Farao kidangi aser pa yimsüsür kidangi yok. Yamaji Ijip lima ajak manga telok jagi raksatsü.

²⁵Idangji Faraoi Mosa o Aron na jar ashi, “Nenoki oang saka iba li nung dang nenok Tsüngrem dang tenla-ang.”

²⁶Saka Mosai langzü, “Yamaji inyaktsü tim masü. Onoki KIBUBA ozü Tsüngrem dang tenlatsü alibaji Ijip nunger nükdang tesempatsü lir. Parnok tsüngdang kechi tesempatsü lir ibaji onoki tenla agütsübaji ngura, parnoki onok dak lung agi maontsü no?

²⁷Onoki lisem lima jagi anogo asemnü lenmang aotsüla, aser idakji KIBUBA ozü Tsüngrem dang tenlatsüla.”

²⁸Anungji Faraoi ashi, “KIBUBA nenok Tsüngrem dang tenlatsü ni nenok odaktsütsü, saka nenoki talangka maotsüla. Tang ni asoshi mepishijangma.”

²⁹Mosai langzü, “Ni na nungi pila-a alidang manga teloktemji na, ne yimsüsürtem aser nüburtem nungi asüng odaktsütsü asoshi ni mepishitsütsü. Saka KIBUBA dang tenlatsü asoshi nüburtem tanaben modaktsüli ta Faraoi külaka tebenshima.”

³⁰Idangji Mosai Farao tsüngdang nungi pila-a oa KIBUBA dang mepishi

³¹aser Mosai mepishiba amaji KIBUBAi inyak. Farao, pa yimsüsürtem aser nüburtem nungi manga ajak oadok.

³²Saka ano Farao mulung meranga aküm aser pai nüburtemji meyok.