Read njo ANITET 9 Bible Online

ANITET 9 - njo bible

ANITET 9

¹Idangji KIBUBAi Mosa dang ashi, “Farao dangi oang aser pa dang shiang, KIBUBA Ibri nunger Tsüngremi ashir, ‘Kü nüburtem ni külemtsü asoshi odakjang.

²Nai parnok meyoki anosa sota yura,

³ni tetsübutsü tashitak wara ka, moapu nung aliba ne kiset shirurutem, kor, gado, ut, nashi, san aser nabong madaki wara yoka na merenshitsü.

⁴Saka KIBUBAi Israel nunger kiset shiruru aser Ijip nunger kiset shiruru na tsüngda sadangtsü, aser Israel nunger kiset shirurubo kata masütsü.’ ”

⁵Aser KIBUBAi mapang ka atakteta ashi, “Asüng linük nung KIBUBAi ya inyaktsü.”

⁶Asüngji KIBUBAi aji inyak. Ijip nunger kiset shiruru ajak asü, saka Israel nunger kiset shirurubo ka danga masü.

⁷Aser Faraoi nisung kar yoka Israel nungertem kiset shirurutem reprangdaktsü aser parnok meyong ka danga mesüi liasü, saka Farao mulung matsüshi-i liasü aser pai Israel nungerji meyok.

⁸Idangji KIBUBAi Mosa o Aron na dang ashi, “Mimung nungi aut tekapu ka sünga bena arung; Mosai aji Farao tsüngdang anünglen paketjang.

⁹Item auyi tanük jagi Ijip lima ajak asüngtsü aser aji agi tesem ajaklen nisung aser shiruru ajak dak tepzünu kümer adoktsü.”

¹⁰ Anungji parnoki mimung nungi autji agitet aser Farao tsüngdang noktak; aser Mosai aji anünglen pakettsü aser aji agi nisung aser shiruru ajak dak tepzünu komo aküm.

¹¹Aser tepzüno komo adokba agi temezüngertemi Mosa jakdang menoktaktet, kechiaser parnok aser Ijip nunger ajak dak tepzünuji adoka liasü.

¹²Aser Mosa den jembiba amato, KIBUBAi Farao mulung meranga kümdaktsü, aser pai parnok dang manga.

¹³Idangji KIBUBAi Mosa dang ashi, “Anepdang yakta shishiang aser Farao den ajurutepa pa dang shiang, KIBUBA Ibri nunger Tsüngremi yamai ashir: ‘Kü dang külemtsü asoshi kü nübur yokang.

¹⁴Kechiaser tangbo alijak ajak nung ni ama shinga mali ta nai metettsü atema kü temerenshi ajak ne dangi, ne yimsüsürtem aser ne nübur ajak dangi ni yoktsü.

¹⁵Ni ne dak kongshitsüsa kü teka mekang asübo aser ne nüburtem madak tashitak wara agi kü teka mekang asübo tangibo nenok meshi meshia samatsür lila.

¹⁶Saka ne dang kü tashi sayutsü aser kü tenüng alima ajaklen sangoktsütsü asoshi ni na taküm kümzüka yutsüogo.

¹⁷Tang tashi kü nüburtem anema tekong meranger aser kü nübur meyoker.

¹⁸Anungji asüng iba kasa mapang nung ni rürlung kanga tesashi tsükdaktsütsü, koba Ijip akümba anogo nungi tanü tashi kodanga matalokdang.

¹⁹Anungji tang ne kiset shiruru telok aser moapu nung aliba ajak anitentsü yokang; kechiaser moapu nung aliba nisung aser shiruru shia, kidangi anir marui alibatem madak rürlung kanga sashia ni tsükdaktsütsü.’ ”

²⁰Farao yimsüsürtem shirnoki KIBUBAi ashiba oji tsübua liasü, parnoki pei alartem aser kiset shirurutem kidangi aniok.

²¹Saka shirnokisa KIBUBA o manga, pai pei alartem aser kiset shirurutem moapu nung dang toktsü.

²²Idangji KIBUBAi Mosa dang ashi, “Ijip lima ajak nung nisung aser shiruru madak aser Ijip lima ajaklen süngo-lio ajak madak rürlung tsükdaktsütsü asoshi ne teka anünglen mekangang.

²³Aser Mosai pa teka anünglen mekang aser KIBUBAi tsüngmok aser rürlung yok aser ali madak tsüngi ayi. Aser KIBUBAi Ijip lima ajaklen rürlung tsükdaktsü.

²⁴ Oda Ijip kin ka kümer parnok dak kodanga matalokdangba tsüngpret pereta, tsüngmok moka rürlung tulu tsük.

²⁵Aser Ijip lima ajaklen moapu nung aliba nisung aser shiruru ajak dak rürlung jagi aon. Süngdong aser süngo-lio ajak iba jagi raksatsü.

²⁶Saka Israel nungertem alidak Goshen linük dang rürlungji metsük.”

²⁷Idangji Faraoi Mosa o Aron na jar ashi, “Tanbo ni temenen menaogo, KIBUBAji shitak lir, atangji aser kü nüburtemi tai menaogo.

²⁸KIBUBA dang mepishijang, kechiaser tsüngmok amokba aser rürlung tsükba yagi periogo! Ni nenok yokadokdi; nenok idaki talangka ata-a telima.”

²⁹Mosai langzü, “Ni yimti nungi tuguli kü teka mekanga KIBUBA dang mepishitsüra tsüngmokji anenadoktsü aser rürlung joko malitsü, aser alimaji KIBUBA meyong ta nai metettsü.

³⁰Aji saka, ni metet, na aser ne yimsüsürtemi KIBUBA ano metsübur.”

³¹Tang kümpa aser barley tsük rürlung agi raksatsü, kechiaser barley tsükpok aser kümpa temechi adoka liasü.

³²Saka wheat tsük aser spelt tsükbo meraksatsü, kechiaser itemjibo ano madoki liasü.

³³Mosai Farao nungi pila aser yimti nungi adoka pei teka mekanga KIBUBA dang mepishi, aser tsüngmok amokba, rürlung tsükba tzünglu aruba ajak anen.

³⁴Saka kodang tzünglu, rürlung aser tsüngmok anenbaji Faraoi angu, pai tanaben temenen mena. Idangji pa aser pa yimsüsürtem temulung meranga aküm.

³⁵Aser Mosa ajanga KIBUBAi jembiba amato Farao temulung meranga aküm aser pai Israel nungertem meyok.