Read njo YOB 1 Bible Online

YOB 1 - njo bible

YOB 1

¹Uz lima nung nisung ka tenüng agi Yob liasü. Iba nisung tetemjen aser tindang, shibai Tsüngrem tsübu aser temenen sempa.

²Pa jabaso tenet aser jala asem liasü.

³Pa rongsena san meyi tenet, ut meyi asem, alu alaba nashi pungchi noklang pungu, gado noklang pungu, aser kilir jenti liasü. Aji agi anüdoklen alir ajak dang iba nisung tulutiba liasü.

⁴Pa jabasotem parnok ki shia pei ataba anogo nung benjong yanglu; aser parnok den chia ajemtsü asoshi par tenu tetsür asem jali asü.

⁵Kodangsa parnok benjong anogo atem, Yobi parnok ja-a meshitettsü, aser anepungi saaka parnok ajak asoshi tarongba tenla kaka tenla; kechiyong Yobi ashi, “Ashiko ozü chirtemi temenen menaogo südi, aser parnok mulungjang nung Tsüngrem atakatemogo südi.” Yamaji Yobi maneni inyak.

⁶ Kenü anogo Tsüngrem chirtemi[1] KIBUBA madangi ajuruteptsü aru, aser parnok den Satana aru.

⁷KIBUBAi Satan[2] dang ashi, “Na kolen nungi?” Idangji Satani KIBUBA dang langzü, “Alima nung oli aruli ta, aser angji tuli aluli ta nungi.”

⁸Aser KIBUBAi Satan dang ashi, “Kü tenzüker Yob dak nai tenük yokogo ma? Kechiaser alima nung tetemjen aser tindang nisung, Tsüngrem tsübur aser tamajung sempar pa ama shinga mali.”

⁹ Idangji Satani KIBUBA dang langzüa ashi, “Yobi Tsüngrem dang tsübur ama?

¹⁰Pa meketa, par ki meketa, aser pa akaba ajak meketa, ajaklen nai atsü matsü ama? Nai pa teka mapa moatsüogo aser ali nung pa rongsen züiner.

¹¹Saka tang neka songtoka pa akaba ajak dak kongshiangjo, pai ne jakdang na atakatemtsü.”

¹²KIBUBAI Satan dang ashi, “Ajiang, pa akaba ajak neka nung lir; pa dak dang nai tekongshi.” Anungji Satani KIBUBA madang nungi pila-a ao.

¹³Kenü anogo kodang Yober chirtem parnok tedi tambusanger kidang benjong chia liasü,

¹⁴Osangbener ka arua Yob dang ashi, “Nashi pungchitem alu alaya liasü aser aji anasa gadotem chimya liasü,

¹⁵aser aoksa-a Sabea[3] nungeri amak aser item ajak bener ogo. Parnoki kilirtem ajak lepsetogo, aser ne dang ashitsü kü kija dang jentet.”

¹⁶Pai shiya alidang ano tangar ka arua ashi, “Anüng nungi Tsüngrem mi tsük aser san o kilirtem rongsetogo; aser ne dang ashitsü ni kija dang jentet.”

¹⁷Pai shiya alidang ano tangar ka arua ashi, “Kaldi[4] nungeri telok asem kümer arua uttem dak amtak aser item bener ogo; nok agi kilirtem lepsetogo; aser ne dang ashitsü ni kija dang jentet.”

¹⁸Pai shiya alidang ano tangar ka arua ashi, “Ner chirtem parnok tedi tambusang kidang chiyunga-jema liasü,

¹⁹aser ajiang, arem nungi mopung tulu ka adok aser ki kinük pezüsü dak aon aser ner chirtem dak chirep aser parnok süogo; aser nia ne dang ashitsü ni kija dang jentet.”

²⁰Idangji Yobi arameso, aser semoksü shisa, aser pa tekolak sütok, aser ali nung lao, aser külem;

²¹aser pai ashi, “Kütsü pok nungi ni mangsa adok, aser ilenjagi ni mangsa aotsü; KIBUBAi agütsü aser KIBUBAi bener ao; KIBUBA tenüng moajang.”

²²Ya ajak nung Yobi temenen memena, mesüra mashi-i KIBUBA dak matong.