Read njo YOB 10 Bible Online

YOB 10 - njo bible

YOB 10

¹Ni kü taküm agi alaker; Ni kü timtem atema nemnemtsü; Kü tanela taku indang ni jembitsü.

²Ni Tsüngrem dang ashitsü, Ni taitsü; Kechisünung nai kü den tokteper; Kü dang sayuang.

³Nai rishikangshitsü, nai yangluba mapa mesenmetutsü, aser tamajunger tasa nung pelatsü; Ya na asoshi tepelatsü asü?

⁴Ne dak nisung tenük aten asü? Mesüra nisungi anguba ama nai angur asü?

⁵Nisunger ama ne anogo tatsü asü? Mesüra nisunger ama ne arishi tatsü asü?

⁶Kü tai apuba aser kü menen bushiba ya kechiba?

⁷Ni tamajunger masü; Aser neka nungi kümzüktsü shinga mali ta nai metetaka, kechiba yamai benshir?

⁸Neka agi ni yanglua renemtsü; Saka meyiper nai ni raksatsütsü atonger!

⁹Nai ya bilemtetang, ajongli ama nai ni yangluogo; Aser ano nai ni auyisa kümdaktsütsü no?

¹⁰Nai ni mamatzü ama yimzüker; Mamatzü telong ama mekümdaktsü ama?

¹¹Nai kü teküp aser shi agi meyipangtsüogo, aser teret aser tetsü agi alenteptsüogo.

¹²Nai kü nem taküm agütsü aser temeim sayu, aser nai anebaluba agi kü nela kümzükogo.

¹³Yongjia itemi ne mulung nung rema ayu; Ne tebilemba ya liasü ta ni metet.

¹⁴Ni temenen menara nai aji ajioka ayur. Aser kü tai nungi nai ni mekümzüker.

¹⁵Ni aibelenra ni asoshi aiatai; Aser ni temeshi lira, kü kolak angaka matuteter; Kechiyong ni taak aser timtem agi sünga lir.

¹⁶Kü kolak angaka tura, molusongzü ama nai ni arishir; Aser ni anema ne aintem sayur.

¹⁷Ni anema nai kuli tasen yoker, aser kü madang tali rasar, Aser ni anema temeranger telok aser tongbang yokjen yoker.

¹⁸Aji asünung kechiba nai ni kütsü pok nungi agitet? Ni süadok tajungba aser shingaia ni mangu tajungba süla.

¹⁹Oda ni taküm mali tajungba süla; Sozükli lepi aben tajungba süla.

²⁰Kü arishi anogo ishika dang masü no? Kü kija tokjang aji oda ni mapang tatsüka asoshi pela-a alitsüsa,

²¹kodanga meyipa meshilangtsüba limai ni maodang; Tammang aser ammang temelem limai;

²²Oda kecha lemteta maliba lima; kong tesangwajia tammang dang.