Read njo YOB 11 Bible Online

YOB 11 - njo bible

YOB 11

¹Idangji Namat nungba Zofari langzü;

²Oh paikati melangzüi toktsütsü no? Nisung ka jembijen jembiba agi pa metentsü no?

³Na asüküma jembira tangar ajem-ajema alitsü asü? Aser kodang nai ataladir, shingaia na mak mesüdaktsütsü asü?

⁴Kechiaser nai ashir, “Kü tamangba temeshi lir, aser ne nükdang ni merüka lir.”

⁵Saka, Oh Tsüngremi jembila sang; Aser na anema tebang lapokla sang;

⁶Aser pai tashi temetet kipok o, Oda aji agi koda tesüngmangtsü inyaker, aji sayula sang! Anungji, Tsüngremi ne menen yari masü oda tilaba akhanger ta metetang.

⁷Nai oda bushiba agi Tsüngrem ngudi ma? Ajak Takoksang indang nai ajak tabensa ngudi ma?

⁸Ibai anüng dang nungi talangba; Nai kechi inyaktet? Sheol dang nungi tarokba; Nai kechi metettsü akok?

⁹Aji alima tasazük dang nungi talangba; Aser tzüyim danga tesademba;

¹⁰Pa ajanga süira, aser puokra; Aser o bendangtsü mungdang jakzükra; Shibai pa noktangtsü akok?

¹¹Kechiaser pai samesa nisungji meteter; Kodang pai temenen ajitetdir, pai aji yutsüdi ma?

¹²Anungji kodang arem gado chanu nisung kümdir, Idangjiang teladak nisungi shisatsü angutsü.

¹³Nai ne mulungjang shitak anishira; Aser pa tsütsü teka songlara;

¹⁴Neka nung temenen lira, aji talangi endokang; Aser ne süki nung memeshiba temungdaktsü.

¹⁵Atangji idangjibo tarak meketi nai ne tejak sayutsü; Hau, na akanga alitsü aser metsübutsü.

¹⁶Kechiaser ne timtemba nai mamatsü; Tzü yima oadok amato nai aji bilemtettsü;

¹⁷Aser ne taküm anüngdang nungibo tejangjaba asütsü; Ammangji anepdang ama akümtsü.

¹⁸Aser na kümzüka alitsü, kechiaser teimlatsü lir; Hau, nai meketa reprangshiranger, tejenbudak nai anisüngzüktsü.

¹⁹Shingaia na metsübudaktsüi na mejangtsü; Hau, aikati ne den temba yimnütsü.

²⁰Saka tamajunger tenük makai akümtsü; Aser parnoki kolenianga majentsü; Aser tangula sashiba anenbaji dang parnok teimla asütsü.