Read njo YOB 12 Bible Online

YOB 12 - njo bible

YOB 12

¹Idangji Yobi langzü;

²Atangji nenok dang temeteter, Aser nenok den tashitemetetjia asütsü.

³Saka nenok den kasa ni angateter; Nenok dang ni tekübok masü, Hau, item memetetba shir ali?

⁴Tembartemi menütsütsüsang nibo kümogo; Oda ni Tsüngrem dang sarasademer aser pai langzü Ni tai makasang aser tetemjen sang!

⁵Shiba tiptema ali pa mulung nung tia makar sempar; Alangya alir asoshi aji renema kar.

⁶Rakzükraktemer süki azükarur; Aser shiri Tsüngrem ain adokdaktsür parnok kecha masür; Parnoki pei ainji Tsüngrem ta bilemer!

⁷Saka tang arem shiruru dang asüngdangang, aser parnoki na sayutsü; Aser anüng ozü dang asüngdangang, aser parnoki ne dang ashitsü.

⁸Mesüra ali nung ayazür dang asüngdangang, aser parnoki na sayutsü; Aser tzüyim angotemi ne dang sangoktsütsü.

⁹Item ajak ajanga, KIBUBA teka agi ya inyak ta shibai meshitettsü?

¹⁰Taküm aliba ajak tanela, aser meimchir ajak tangula, pa ket nung lir.

¹¹Temeli-i aon menakdangba ama, tenarongi o matitanger ama?

¹²Tambur dak temetetba shisatsü lir, aser ar-ashir dak tangatetba mali no?

¹³Shisatsü aser temetetbaji Tsüngrem nungi; Pa dak tasa aser tangatetba lir.

¹⁴Pai raksara, shingaia meyanglutettsü; Pai kar shibangra shingaia melapoktettsü.

¹⁵Pai tzüji sotra, itemji kongadoker; Pai itemji yokra, parnoki alimaji mobanger.

¹⁶Pa dak tashi aser tasa tajung lir, shibai aibelener aser shibai aibelendaktsür, parnok pa meyong.

¹⁷Pai yimsüsürtem tasa raksatsür, aser obendangertem suwar kümtsür.

¹⁸Pai chubatem yinzü salatsür; Aser parnok teperem lisü agi alentsür.

¹⁹Pai putirtem alener aor, aser shir tashi ita ali parnok atsüngdoker.

²⁰Pai tatartem o magir; Aser tambur tebilemba endoker.

²¹Pai chubatem mak sütsür; Aser tashi taiter shiküp salatsür.

²²Pai tammang nungi oset tarok angur; Aser ammang tanakji tesangwai bener adoker.

²³Pai kintem züindaktsür aser itemji raksatsür; Pai kintem prokshidaktsür aser oda toktsür.

²⁴Alima nung tongtipur tebilemba magir, Aser lenmang malidak azüngmeyakdak nemzüdaktsür;

²⁵Milen makai parnoki ammang nung nemzür, Aser yi agi meseper ama ayazüdaktsür.