Read njo YOB 14 Bible Online

YOB 14 - njo bible

YOB 14

¹Tetsüri asoba nisung arishi tatsü, aser timtem agi sünga lir.

²Naro ka ama pa apunger, aser azüla-a adoker; Ano akhüm ka ama ajener, aser meli-i akümer.

³Aser ibala ka dak nai ne tenük yoker ama? Aser ne den kü o bendanger ama?

⁴Shibai memerükba nungi temerük oset adokdaktsütet? Shinga melika.

⁵Pa anogo atakzüka lira, pa ita kwi alitsü nai meteta lira, aser pai ajanga motettsüsa nai pa arrtsü yangluja lira;

⁶Ayangeri pei anogo temer jangratema kazüba ama; Pa anisüngzüktsütsü asoshi nai pa dak nungi ne tenük tangalen ranglokang.

⁷Kechiaser süngdong ka asoshibo teimla lir; Aji lensükra, ano meitsü aser iba süngsem mesamatsü.

⁸Iba tera ali nung tain kümaka; Aser ali nung iba tembang süaka,

⁹Angjia, tzü tashi agi aji meitsü; Aser süng lanu ama kongsang asangtsü.

¹⁰Saka nisungbo süadoker, aser sama-a aor; Hau, nisung asür, aser pa kong ali?

¹¹Awatsüng nung tzü akongba ama; Aser ayong ka sama-a akongba medem;

¹²Yamaji nisung ondaker aser meshishir; Anüng mesama tashi parnoki mesaktsü; Mesüra parnok mejangba nungi mesaktsü.

¹³Oh, nai ni Sheol nung atsüka toktsü asübo, Na ain adok mesüngzük tashi, nai ni miima ayu asübo, aser ni asoshi mapang ka lemtetja ni bilemtet asübo!

¹⁴Nisung ka süra pa ano shia arudi ma? Ni kü taküm wadang tepiyong ni atatsü, oda ni mechiok tashi.

¹⁵Nai jara, ni langzükla; Aser neka agi renemba ka asoshi nai yongyaseta lilasang.

¹⁶Saka tang nai kü mera züngtetlasang; Nai kü menen madak nüka melila.

¹⁷Ni ozüng raksaba juli ka nung alenbanga yutsüla; Aser nai kü tai nembangtsüla.

¹⁸Aser atangji tenem anenzüka alur, menüngsa-a aor; Aser lungji pei talidak nungi aenshir;

¹⁹Tzü agi lungtem sentemer; Aser aji moshia ayimba agi alima nung auyi oker aor; Aser yamaji nai nisung teimla raksatsür.

²⁰Teti asoshi pa anema nai akoker, aser pai oadoker; Nai pa tejak melenshitsür aser pa yokadoker.

²¹Par chirtem nüngsang angur, aser aji pai memeteter; Aser parnok ludaktsür, saka pai item meshiteter.

²²Pa shi dang ayako atener; Aser pa tanelai telung nung pei asoshi mang ayimer.