Read njo YOB 15 Bible Online

YOB 15 - njo bible

YOB 15

¹Idangji Teman nungba Elifazi langzü;

²Tashir kati amajok shisatsü agi langzüdi ma? Aser pa tepok anüdoklen mopung agi süngtsüdi ma?

³Tajangzük makaba o den, mesüra kecha meinyaktetba o jembiba den, pai bangsentepdi ma?

⁴Hau, nai Tsüngrem tsübuba pungdoker; Aser Tsüngrem madang mokorai külemba noktanger.

⁵Kechiaser ne menen agi ne bang anishir, Aser nai tekülaker temeli shimer.

⁶Ni masü, nebang agi pei sasa aitsür; Aser nebangmechi agi na anema kuli agütsür.

⁷Ajak dang na tama aso asü? Mesüra tenemtem meyangludang na aküm asü?

⁸Tsüngrem kipok mungdang nung na tendang asü? Aser tashi temetet shisatsü ne tsüta dang aküm asü?

⁹Nai metetba onoki kechi memetet? Nai angatetba onokibo mangateter asü?

¹⁰Nebu dang kanga tambu, onok den kupu apur aser kanga tamburtem lir.

¹¹Tsüngremi süneptsüba, aser ne den o anüka jembitsübaji na asoshi ilara asü?

¹²Kechiba ne mulung mazüokteter? Aser kechiba ne tenük remshir?

¹³Kechiba ne nelai Tsüngrem anema noktaker, aser ibala o nebang nungi chioker?

¹⁴ Pa merüka alitsüsa nisungji kechi? Aser tetsüri asoba koda meshia litet?

¹⁵Ajiang, pai temeshipur daka temulung malemer. Hau, pa nükdang anüngtemjia memerük.

¹⁶Ajangla tesempatsü aser memerükba, aser tzü ama temenen ajemba nisung balaka koda tilaba züngshitsü?

¹⁷Ni sayudi, nai angang; Aser ni kechi ngua aruogo aji shidi;

¹⁸Koba tashirtemi pei tsürabur nungi, miima meyui shin;

¹⁹Shir nem dang aliji agütsü, Aser shir den aener shinga mali asü.

²⁰Arishi tepiyong, oda rishikangshir asoshi küm kwi züngzüka ali; Papigaji tamajungerji timtem agi kangshir.

²¹Pa narong nung tetsübu ola lir; Azükarudang rakzükraktemer pa dangi arutsü.

²²Pa tammangdak nungi shilangtsü ta pai mamanger, Aser pa asoshi nok renema lir.

²³Pai chiyungtsü bushia senzür aser ashir, “Aji kong ali?” Pa asoshi tammang anogo pa madang lir ta pai meteta lir;

²⁴Timtem aser toushi agi pa tsübudaktsür; Chuba ka tongbangi aotsü renemba ama, parnoki pa akoker;

²⁵Kechiaser pai Tsüngrem anema teka sala, Aser ajak Takoksang anema asüküm.

²⁶Jong temelem apunger, Pai arishia pa dak pungloker;

²⁷Kechiaser pa tejak temo dang, Aser tenük-telen yira-yira-a kümdaktsüogo;

²⁸Aser pai yimtok nung alir, Idakji kidang shinga malir, Aser aji lungnang akümer.

²⁹Pa takar makümer, pa rongsen tatem akümtsü; Mesüra pa tsükjong alilen mashitsü.

³⁰Pa tammangdak nungi mepilatsü; Milak agi pa kongsang merutsü, Aser pa tebang tangula agi pa apudoktsü.

³¹Pa sasa külakokja, pai amajok nung temulung telemdaktsü; Kechiaser pa tajangzükji amajok dang asütsü.

³²Anojungi pa kongsang leptoktsü, Aser pa kongsang lanu malitsü.

³³Tsükmenatzü zü nungi ama pai tsükmenatzü tazü tsükdaktsütsü, Aser oliv dong ama pa teben pungdoktsü.

³⁴Kechiaser Tsüngrem metsübur telok tapung alitsü; Aser süpokrem achir sükitem mi agi meyoktsü.

³⁵Parnoki tamajung nu tangloker aser temenen sotsür, Aser parnok tepok agi maksü bena arur.