Read njo YOB 16 Bible Online

YOB 16 - njo bible

YOB 16

¹Idangji Yobi langzü;

²Ibala o aika ni angashiogo; Nenok ajak timtem tali agütsüba tesüneptsür dang.

³Amajok o tatem kadi ma? Mesüra nenoki langzütsüsa kechi agi nenok tawaktsü atudaktsür?

⁴Nenok amaji nia jembitet; nenok nelaji kü nela den melentep asübo; Nenok anema ni o metentepla; Aser nenok dak kü kolak angümloktsüla.

⁵Kü bang agi nenok tashi itdaktsüla; Aser kü bangmechi tanep agi nenok tejashi süneptsüla.

⁶Ni jembiaka kü tejashi mesüngzüker; aser ni aremzükaka aji meyipa maor.

⁷Saka tang pai ni bilemtettsüogo; Pai kü tembar ajak jendaktsüogo.

⁸Pai ni kangtendaktsür; Aser ni kongraba ya ni anema kuli ka ama lir, aser yagi kü tejak nung kuli asür.

⁹Pa ain-abong agi ni shisatsüogo; Aser tesempa agi ni arishiogo; Pai ni anema tepu shitepogo; Kü tsükchiri kü dak tenük kanga yokdar.

¹⁰Parnoki ni anema tebang tulu ka kaogo; Parnoki sensaja kü tenibung nung maogo; Parnoki ni anema arok akümer.

¹¹Tsüngremi memeshiba pur nem ni agütsüogo; Aser tamajunger ket nung langkoshishi mereploktsür.

¹²Ni sünütsü sa-a liasü, saka pai ni ana küma süktangtsü; Hau, pai tekong nung leneter anükanüka ajasatsüogo; Ano pai takatsü asoshi ajioka yuogo.

¹³Pa lijak amertemi ni meketbanger; Taochi makai pai kü tezüngjang sangdangtsür; Ali nung pai kü tasü taku yimshidaktsür.

¹⁴Pai kü dak zübu ketjen kettsür, aser nokinketer ka ama kü dak pungloker.

¹⁵Kü mang nung ni süjen arlokogo, aser kü tenütsü auyi nung melangshiogo.

¹⁶Tajepba agi küjak meremer, kü nükeptsü naknaka lir.

¹⁷Kü teka nung azü tokshiba meliaka, kü sarasadem temerük lir.

¹⁸Oh alima, kü azü nai tenembang; Aser kü tajepba tanendaktsü.

¹⁹ Tang, ajiang, kü kuli kotak nung lir; Aser shibai kü o nung asemer pa temalen lir.

²⁰Kü tembartemi ni sensatsür; Tsüngrem dangi kü nüktzü ayimer;

²¹Oda Tsüngrem den nisung ka timi benshitsü; Nisung kati kiyonger den timi liteptsü merangba ama!

²²Kechiaser küm ishika lirbo, Kodanga meshilangtsüba limai ni aotsü.