Read njo YOB 19 Bible Online

YOB 19 - njo bible

YOB 19

¹Idangji Yobi langzü;

²Nenoki kopiga kü nela pesaprungdaktsütsü? Aser o agi ni ajasatsütsü?

³Terben tashi nenoki ni mesüshiogo; Ni anema tamajung inyakba ya nenok taaka makar?

⁴Aser atangji niang aibelen süra; Kü taiji kü dak atutsü.

⁵Atangji nenoki ni anema pusopulemra; Aser kü timtemba anema o jembira;

⁶Ajangla ya metetang, oda Tsüngremi kü o pelepsatsüogo, aser pa sang agi ni meketbangogo.

⁷Ajiang, kü dak teka aiba anema ni ayimtener, saka kü dang melangzür; Ni teyari ajar, saka temetenba mali.

⁸Ni majangtettsüsa pai kü lenmang tongdangogo; Aser ni taolen pai ammang kümdaktsür.

⁹Kü sentsüwangshi pai kü dak nungi semzükogo; Aser kü kolak nungi korangji bener ogo.

¹⁰Ajaklen pai ni raksatsüogo, aser ni joko maka; Aser kü teimlaji süngdong ka ama pai atsütetogo.

¹¹Ano pai ni anema rasar, aser niji pa tsükchir rongnung ka ta züngshir.

¹²Par temeranger ajak arur, aser ni anema lenmang noktanger, aser kü süki meketa parnok menden mesemer.

¹³Pai kü adianutem ni nungi talangkati piladaktsüogo, aser kü tembartem kü den khenyongi anemer kümogo.

¹⁴Ozü kidongi ni oda toktsüogo, aser kü akang tembartemi ni amaogo.

¹⁵Ozü kidang amungertem aser kü kilitsürtemi ni aener ta bilemer; Parnok nükdang ni bendanger ka kümogo.

¹⁶Ni kü kilir ajar saka pai matanger; Kü bang agi ni pa mepishitsüba dang.

¹⁷Kibutsüi ni sempar, aser kütsüi asoba chirtem madang ni tesempatsü.

¹⁸Tila tanurtemia ni sensatsür; Ni noktakra, parnoki ni anema jembir.

¹⁹Ni temulung lemtetba tembar ajaki ni sempar; Aser shirnok ni meimer, parnokia ni anema noktaker.

²⁰Kü teret teküp agi dang meibanga lir, aser anarongtena dang ni jenbua lir.

²¹Oh, nenok kü tembartem, kü dang aochiang, kü dang aochiang; Kechiaser Tsüngremi kü dak kongshiogo.

²²Tsüngremi arishiba ama, kechiba nenoki ni arishir; Aser kechiba kü shi agi nenok jangra matemer?

²³Oh, kü o ya züluoka yula sang! Oh, o itemji kaket ka nung zülula sang!

²⁴Merang kolem aser shesa agi, lung nung teti asoshi zülula sang!

²⁵Saka ni alangzüksang taküm lir ta ni junga metet; Aser kenü anogo alima nung pai noktaktsü.

²⁶Aser kü mang shizüka or külen, Shi nung mesüia ni Tsüngrem nguküm;

²⁷Pa kü tsütsü lir ta ni metettsü; Pa aener ka masü ta kü tenük agi angutsü, Ni terongjen agi koda malir.

²⁸Pa dak temenen tera puteterji, asenoki pa koda arishila, ta nenoki shira,

²⁹Nenoki nok tsübuang; Kechiaser nenoki obendangba ka lir ta metettsüsa, terasabai nok temerenshi mena-a arur.