Read njo YOB 2 Bible Online

YOB 2 - njo bible

YOB 2

¹Ano kenü anogo Tsüngrem chirtemi KIBUBA madangi ajuruteptsü aru, aser parnok rongnung Satana aru.

²KIBUBAi Satan dang ashi, “Na kolen nungi?” Satani KIBUBA dang langzü, “Alima nung oli aruli ta, aser angji tuli aluli ta nungi.”

³Aser KIBUBAi Satan dang ashi, “Kü tenzüker Yob dak nai tenük yokogo ma? Kechiaser alima nung tetemjen aser tindang nisung, Tsüngrem tsübur aser tamajung sempar pa ama shinga mali; aser kecha masü nung pa raksatsütsü pa anema nai ni mesüzükaka, tang tashi pai shitakba nung ameta lir.”

⁴Aser Satani KIBUBA dang ashi, “Teküp melen teküp, hau, taküm sottsü asoshi nisungi pa akaba ajak agütsütsü.

⁵Saka tang neka songtoka pa teret aser tetsü dak kongshiangjo, pai ne tejak nung atakatemtsü.”

⁶KIBUBAi Satan dang ashi, “Ajiang, pa neka nung lir; pa taküm dang sotang.”

⁷Satani KIBUBA madang nungi pila-a ao, aser tenüklang nungi tekujong tashi komo tulu agi Yob kangshi.

⁸Aser pa sasa anakshitsü asoshi pai porep ka bena aru, aser pai aut rongnung amen.

⁹Idangji tebutsüi pa dang ashi, “Na ano shitakba nung ameta alir no? Tsüngrem atakatemang aser süadokang.”

¹⁰Saka pai la dang ashi, “Nai tamashitsür ka ama jembir. Koda, asenokbo Tsüngrem ket nungi tajungdang agizüker tamajungbo magizüktsü asü?” Ya ajak nung Yobi pa tebang mechi agi temenen memena.

¹¹Tang pa dak lendong aruba ajak Yob tembar asemi angashia, parnoki pei pei talidak nungi aru; Teman nunger Elifaz, Shuhai nunger Bildad, aser Namat nunger Zofar; aser pa dang tejashi sayutsü aser pa süneptsütsü asoshi parnoki külemi mapang lemtet.

¹²Kodang ojita nungi parnoki pa angu, parnoki pa anarongtena-ang ajitet, parnoki ola adoka ajeb aser pei süoshi shisa aser parnok kolak nung aut palok.

¹³Yamaji anogo tenet aser aonung tenet parnoki pa den ali nung amen, aser shingaia pa dang o kata mashi; kechiaser pa timtem kanga tulu ta parnoki ajitet.