Read njo YOB 20 Bible Online

YOB 20 - njo bible

YOB 20

¹Idangji Namat nungba Zofari langzü;

²Iba yongji kü tangatetbai kü dang langzür; Aser ajagi kü mulung nung ya ariteper.

³Ni mak asütsüsa arütsüba ni angashiogo; Aser ni angatetba nungi kü nelai kü dang langzür.

⁴Atangji nai metet; Akhidang alima nung nisung toktsüli nungi;

⁵Tamajunger takokbaji ari mashir; Aser Tsüngrem dak mamanger pelabaji kenpiga dang ta nai meteter ma?

⁶Anüng tonga pa mezümeküm yong; Aser mepet tonga pa tekolak atu yonga;

⁷Pa pei jana ama teti asoshi samar; Shirnoki pa ngua aru parnoki ashir, pa kwa?

⁸Pungmang ka ama pa yima aor aser mungui akümer; Aser aonung mangdang ka ama pa aridokadoker.

⁹Tenük kobai pa angu joko pa mangutsü; Mesüra pa talidakia joko pa memetettsü.

¹⁰Par chirtemi sensaker dang temeim bushitsü; Aser pa keti pa rongsen shia agütsütsü.

¹¹Pa teret ano asangwa amadang; Saka auyi nung aji pa den mejangtsü.

¹²Pa tebang nung tamajungji nangaka; Aser pa meli agi aji miimbangaka;

¹³Pai aji mechioki anebaluaka; Aser pa tebang nung ano aji yuaka;

¹⁴Yongjia pa chiyungtsü jagi pa tepok ashir, aser mim per pa dak lir.

¹⁵Pai rongsen meyoker, aser tanaben saktsüdoker; Pa tepok nungi Tsüngremi itemji saktsütoktsür.

¹⁶Per mim pai meseper; Pei meli agi pa südaktsür.

¹⁷Totzü adokba ayong, aser ninang mojitzü o mamatzü ayimba ayongtem pai mangutsü.

¹⁸Pai züsentetba shia agüjaka, pai aji mechishitsü; Shishilemba dang tajangzük anguba yari pai mepelatsü.

¹⁹Kechiaser pai sensakertem kangshi aser oda toktsü; Pai meyangluba ki ka dak pa teka yia rakzük.

²⁰Pa tepok kodanga masüng nungji, pai temulung alemba rongsen pai teraka merizüngtettsü.

²¹Pai merumeru masüba kecha mali; Anungji pa azükaru tatem matongtsü.

²²Pa kechisarena agi abensa-a liaka, pa anüng-apunger; Timtemer shiai pa anema lir.

²³Tsüngremi pa anema mit tesashi adokba; Tzünglu ama yokba jagi dang pa tepok sünger liang.

²⁴Pai merang nok o nü nungi ajentsü; Aser yongmenyin lijakjang kati pa dak ateta akatsü.

²⁵Pai aji teperemleni atsüteter; Aser sentsüprangba lijakjangji pa tesa nungi atsüteter; Pa madak tetsübutsü agi atonger.

²⁶Pa rongsenji ajak amajok dang; Nisungi mapuba mi ka agi pa rongseper; Pa süki nung tanüngba oset nung aji jangrur.

²⁷Anüngi pa menen jangjadaktsür; Aser alimai pa anema noktaker.

²⁸Tsüngrem terasaba anogo nung mopungi oset oner ao ama; Par kidang züsentetba tanga limai bener aor.

²⁹Tsüngrem nungi tamajunger nisung ka asoshi shilemji ya; Aser Tsüngremi lemzüktsüba senmangji ibai alitsü.