Read njo YOB 21 Bible Online

YOB 21 - njo bible

YOB 21

¹Idangji Yobi langzü;

²Kü o tenarong tena angang; Aser yagi nenok sünepjang.

³Aremzüka ata-ang aser ni jembitsü. Aser ni jembimar külen, ni atala-ang.

⁴Ni ya nisung anema nemnemer asü? Aser ni kechiba taremzük makai alitsü?

⁵Ni ajiang, aser pangka-ang; Aser teka agi nebang nembangang.

⁶Kodangsa ni bilemtetdir ni shisa bulur; Aser kü mang tetsübutsü agi asünger.

⁷Tamajunger kechisü nung taküm alir? Ar shia alir, aser tashi tulu akümer?

⁸Parnok den parnok metsü azükaru; Aser parnok nükdang parnok chirtem kümzüka lir.

⁹Tetsübu nungi parnok kibongtem jenbua lir; Mesüra Tsüngrem ajoka parnok dak memekanger.

¹⁰Parnok nashi pungchitemi metitemi metsü rendaktsür; Nashi tzüla techanu mepur aser memeindoker.

¹¹Parnok chirnur san telok ka ama yoker; Aser parnok chirtem tsüngsanger.

¹²Parnoki asüm tema aser tsürang kongki wa-a ken atener, aser jemji ola den lungsoteper.

¹³Parnoki parnok taküm azükaru nung atemer; Aser aoksa-a asüyimi alur.

¹⁴Aji saka parnoki Tsüngrem dang ashi; “Onok dang nungi oang, Kechiaser ne yimsü metettsü asoshi onoki mejangrar.

¹⁵Onoki pa külemtsüsa ajak Takoksangji shiba? Aser onoki pa dang sarasademra onok kechi tajangzük alitsü?”

¹⁶Ajiang, parnok azükarubaji parnok ket nungi madoker; Tamajunger tebilembaji ni nungi talangka pila-a lir.

¹⁷Tamajunger milen kwibensa remseper? Kwiben lendong parnok dangi arur? Kwiben Tsüngrem ain adokdang timtem lemzüktsür?

¹⁸Mopung madang parnok monü ama; Aser tsüksü ama yiprui bener aor?

¹⁹Nenoki ashir, “Tsüngremi parnok chirtem asoshi temerenshi rizünga lir;” Pai aji metettsüsa nisungba nemji aji agütsüdangang.

²⁰Pa tesamaji pa sasa ngudakjang; Aser ajak Takoksang terasabaji pa nem jemdakjang.

²¹Kechiaser pa ita-a abensa-adok ta asünung; Pa sülen par ki nung pai kechi tejangraba alitsü?

²²Temalen alir pai o bendanger ta meteta; Shibai Tsüngrem dang shisatsü sayutsü?

²³Kar kaaita pei sünütsü süa lir temsüa asür

²⁴Pa temang temo agi sünga; Aser teret tenüngla tayi lir.

²⁵Karbo tanela taku nung asür, Aser tajungji kodanga memenakdang.

²⁶Parnok ajak kasasa auyi nung mejanger; Aser parnok mesen agi asünger.

²⁷Ajiang, ne tebilemba aser ni anema tasa tamajung kechisa asar, ni meteta lir.

²⁸Kechiaser nenoki ashir, “Chuba ki to kong ali? Aser tamajunger alidak süki to kwa?”

²⁹Süisübonger dang nenoki masüngdang asü? Aser parnok kuli nenoki hau ta malir no?

³⁰Lendong anogo nung nisung tamajungji sota ayur; Aser terasaba anogo nung parnok kümzüker.

³¹Pa jakdang shibai pa indang rakpoka ashitsü? Aser pai mapa ka inyakra, shibai taa agütsütsü?

³²Ajidang masü, pa leperi apur aor, aser parnoki pa lep anüker;

³³Lenten liji pa dang kanga tajung aser pa jakdang mezüngteti aliba ama; Nisung ajak pa sülen aor.

³⁴Ajangla, nenok telangzübaji tiyazü dang ta meteta; Amajok nung kodaser nenoki ni süneptsür?