Read njo YOB 22 Bible Online

YOB 22 - njo bible

YOB 22

¹Idangji Teman nungba Elifazi langzü;

² Tsüngrem asoshi nisung kaji tajangzük lidi ma? Atangji tashirji dang pa asoshi tajangzük asü?

³Na temeshia ta asübaji ajak Takoksang asoshi hau ta ali asü? Mesüra, ne lenmang temsüa lir ta asübaji pa asoshi tajangzük asü?

⁴Nai pa tsübu nung pai na arütsür, aser ne o bendanger asü?

⁵Ne temenen tulu masü no? Ne temenenji tatem maka.

⁶Kechiaser tiyazü nung ne adianu nungi nai sentem agir; Aser makar dang nungi nai parnok süoshi rakzüker.

⁷Tebelemer nem tzü tajemtsü nai magütsür. Aser yaseta alir nem nai chiyungtsü magütsüi ayur.

⁸Tashi akartem ket nung aliji lir, aser maongka angurtem yangji alir.

⁹Amitsürtem nai tazüngla yokogo, aser lajartem teka nai raksatsüogo.

¹⁰Anungji na meketa sang soa lir; Aser aoksa-a aruba lendong agi na kangshir.

¹¹Ne tesangwa nai mangutsüsa mangogo; Aser tzümetsüng agi na nembanger.

¹²Tsüngrem kotak temaba nung mali no? Aser petinutem ajiang, item koda azük nung lir!

¹³Aser nai ashir, “Tsüngremi kechi metet?” Tammang temelem ajanga nai o bendangtetdi ma?

¹⁴Pai mangutsüsa mepet temelem agi pa nembanger; Aser pai kotak temeket nung jajar.

¹⁵Koba lenmang nung tamajunger jaja; Iba tejen lenmang nung na odi ma?

¹⁶Anojungi parnok tashi agi rakzüker aor; Parnok kimungji tzü agi metsüngbang.

¹⁷Parnoki Tsüngrem dang ashi, “Onok dang nungi oadokang, aser ajak Takoksangi onok asoshi kechi inyaktet?”

¹⁸Yongjia pai oset tajung agi parnok ki süngtsü; Saka tamajunger tebilembaji ni nungi talangka pila-a lir.

¹⁹Temeshipuri aji angur aser pelar; Aser tai makartemi parnok sensaja menütsür;

²⁰Aser ashir, “Atangji parnok rongsen samaogo, aser mi agi parnok takaba rongdokogo.”

²¹Nai Tsüngrem den temba yimang aser yimjung nung liang; Yamaji asüba agi na azükarutsü.

²²Ni ne dang mepishir, pa tebang nungi teinyaktsü ozüng agizükang; Aser pa o ne mulung nung yuang.

²³Nai ajak Takoksang dangi meyipa arura, aser ajemalura; Ne süki nungi memeshibaji talangkati nai endokra;

²⁴Aser honji auyi nung toktsüra; Aser ayong nung lung rongnung Ofir honji endokra;

²⁵Idangji ajak Takoksangji ne hon asütsü; Aser pai sayuba lenmangji senti alitsü.

²⁶Kechiaser idangjibo nai ne sasa ajak Takoksang dak pelatsü; Aser Tsüngrem tsütsü ne tejak ashitsü.

²⁷Nai pa dangi ne sarasadem yoktsü; Aser pai ne dang angashitsü; Aser nai tenangzükba tenlatsü.

²⁸Ano nai langka lemtettsü; aser aji ne nem ataloktsütsü; Aser ne lenmang nung tesangwa ayatsü.

²⁹Kechiaser Tsüngremi asükümer ludaktsür; Saka ajemalur pai kümzüktsü;

³⁰Pai tai makar kümzüker; Hau, neka merüka lira na kümzüktsü.