Read njo YOB 24 Bible Online

YOB 24 - njo bible

YOB 24

¹Kechiba ajak Takoksangi okatsü mapang melemteter? Aser shiri pa metet, parnoki kechiba pa anogotem mangur?

²Nisungtemi arrtsü lung loktoker; Parnoki shiruru teloktem rakzüka aor, aser itemji chiyimdaktsür.

³Lajartem meyong gado miener aor; Aser amitsür meyong nashi pungchi sentsü melen agir.

⁴Parnoki sensakertem kishileni aridoker; Alima nung sensaker ajak külemi atsüka alir.

⁵Ajiang, azüngmeyakdak arem gado ama; Chiyungtsü kanga kümdanga bushia parnoki parnok mapai aor; Parnok chirtem asoshi arem jagi chiyungtsü agütsür.

⁶Parnoki arem nung rem aleper; Parnoki takar atsü nungi süngjanglijang tejangtem bener aor.

⁷Parnoki ammang tepiyong mangsa mejanger; Aser asükwa abentsü sü maka;

⁸Tenem len nungi aluba tzünglu agi parnok tenlar; Aser jenokdak maka nung parnoki lungpok nung atsüker.

⁹Lajartem mama teyongdak rakzüker; Aser sensaker kinüji sentsü melen agir;

¹⁰Karbo tabentsü makai mangsa aor, aser lumiseta parnoki tsükjong abener;

¹¹Atsü jaratem tsüngda nung parnoki totzü menünger; Parnoki totzü menüngdak inyaker aser tzüraseta alir.

¹²Tasürtemi anüngba ola yimti nungjagi adoker; Aser yirua alirtem tanelai teyari asoshi ayimtener; Saka Tsüngremi parnok sarasadembaji hau ta mali.

¹³Parnokji tesangwa anema noktakertem lir; Shirnoki tesangwa lenmang meshitet; Mesüra item lenmang nung mejajar.

¹⁴Sensaker aser makartem tepsettsü asoshi mesangwa dang nisung tepseteri shishir; Aser aonung pai auya-a senzür.

¹⁵Nüktapangtari züngia aliba mapang atar; Aser ashir, “Shingaia ni mangutsü” aser pai süko meir.

¹⁶Ammang nung parnoki ki rakpoker; Anüngdang parnok atsüka alir; Parnoki tesangwaji mungudanger.

¹⁷Kechiyong parnok ajak asoshi ammang temelemji anepdang ama lir; Kechiaser parnok ammang temelem tembar lir.

¹⁸Parnoki tzü manung kara kara aor; Parnok tsüta alima nung atakatemogo; Parnok lui shinga maor.

¹⁹Tsüngsarusa aser tatsük agi rürjep tzü ruseptsür; Yamaji Sheoli temenen pur meyoker.

²⁰Tetsüpoki parnok amadoktsü; Mesen agi parnok nangnanga achitsü; Parnok joko kodanga mebilemtettsü; Aser memeshibaji süngdong ka ama kosüker.

²¹Parnoki tetsür tapung mejungi amshir; Aser amitsür dang tajung meinyaker;

²²Aji saka parnok ain ajanga Tsüngremi tashi taiter taküm lidaktsür; Parnok taküm alitsü ta pai mamangaka, pai shishir.

²³Tsüngremi parnok nem temulung lemtetba melar; Aser parnoki idakji mangadaker; Aser parnok aolen pai tenük yoker.

²⁴Tatsüka asoshi parnok ajungketer aser parnok oadoker; Hau, parnok ludaktsür, tangar ajak ama parnok leptoker; Aser mendi talak ama parnok leptoker.

²⁵Aser tang yamaji mesüra, shibai ni tiyazü ta kuli agütsütsü? Aser kü o amajok kümtsütsü?