Read njo YOB 28 Bible Online

YOB 28 - njo bible

YOB 28

¹Atangji taribi atudak ka lir; Aser hon meludak tesem ka lir.

²Ali nungi merang agiteter; Aser lung nungi yongmenyin meluteter.

³Nisungi tammangji tatembang kümdaktsür; Aser nakjanga anakba lungtem kinük okshia bushir.

⁴Temalen nisung alidak nungi pila-a oa pai ali tupoka air; Tetsüng agi jajartemi luagi alirtemji ali mali memetet; Nisung nungi talangka pila-a lur, parnoki lisü nung onshishir.

⁵Alimaji küla, idak nungjagi chiyungtsü adoker; Saka ali telung nungbo mi agi rongsar ama.

⁶Luagi lungtem nungji sapfir sentilung alidak lir; Aser idakji hon tanük lir.

⁷Iba lenmang ozü tulu kechaia memetet; Mesüra mongzü nükia mangur;

⁸Asükümba shirurutemi ilenji mejajadang; Mesüra tesashi molusongzüia ilenji mesüidang.

⁹Lung temerangdakji pai teka air; Tazünglen nungi pai tenemji mekepsar.

¹⁰Lungkerak tsüngpoka pai lenmang yanglur; Aser pa nüki senti oset ajak angur.

¹¹Tzü yimoka maitsüsa pai ayongtem atanger; Aser kechi oset miima ali, aji temai adokdaktsür.

¹²Saka tashi temetetba kong angutsü? Aser tangatetba alidak kong ali?

¹³Nisungi ajagi aotsü lenmang meshitet; Mesüra meimchir alidak aji tangua mangur.

¹⁴Tarokdaki ashir, “Aji kü dak mali” Aser tzüyimi ashir, “Aji kü den mali.”

¹⁵Hon yong aji malitet; Mesüra iba jenjang asoshi taribi muozüktet.

¹⁶Ofir hon agi, oniks sentilung mesüra sapfir agi aji jenjang malangtet.

¹⁷Hon aser aina[7] agi iba den jenjang kasa masü; Mesüra hon temeja oset den aji melenteptsüa makok.

¹⁸Koral mesüra jasper[8] tezüngshitsüa masü; Hau, sentilung dang nungia temetetba shisatsü angutsüji tasakba.

¹⁹Ethiopia topaz[9] agi aji madoksatsü; Mesüra hon temejaba den jenjang madoktet.

²⁰Ajangla kolen nungi tashi temetet arur? Aser tangatetba alidakji kong ali?

²¹Kechiyong akümlir ajak tenük nungi aji miima lir; Aser anüng ozütem dang nungi miima yua lir.

²²Teraksatsüsang aser Tasübai ashir, “Onok narongi iba indang olulu ka angashiogo.”

²³Ilenji aotsü lenmang Tsüngremi shiteta lir; Aser iba talidakji pai meteta lir.

²⁴Kechiaser alima tatem ajaklen pai repranger; Aser anüng ajak kübok pai angur.

²⁵Kodang pai mopungji taret yanglu; Aser tzüyimtemji seret agi odang;

²⁶Kodang pai tzünglu asoshi ozüng yanglu; Aser tsüngmok tsüngpret asoshi lenmang yanglu;

²⁷Idangji pai aji angu, aser rizünga ayu; Pai aji renem, hau, pai aji bushitet.

²⁸ Aser nisung dang pai ashi; Ajiang, KIBUBA akhümtsübuba, aji temetetba shisatsü lir; Aser tamajung nungi pilara, aji tangatetba lir.