Read njo YOB 29 Bible Online

YOB 29 - njo bible

YOB 29

¹Ano tanaben Yobi maneni o jembia ashi;

²Oh, ni tesüiba itatem mapang nung ama ali asübo; Oda Tsüngremi ni nüka aliba amato asübo;

³Kodang pa milen kü kolak dang yadaktsü, aser pa tesangwa agi tamangdak ajanga ni jaja;

⁴Ni aturadang ama, koba mapang nung, Tsüngremi ozü süki awabanga liasü;

⁵Kodang ajak Takoksang ano kü den liasü, aser ozü chirtem ni meketa liasü;

⁶Kodang maken agi kü lenkong shitok, aser lung jagi kü nem totzü ayong küma yimdaktsü!

⁷Kodang ni yimti nung süngkhüm jagi ao, aser kodang yimjak manung ni amen;

⁸Idangji asangurtemi ni ngura atsükadokli asü, aser tamburtemi aramesoa noktakli asü;

⁹Yimsüsürtemi o mejembi, aser teka agi parnok tebang nembang;

¹⁰Tamarenertemi ola madok, aser parnok temeli tebang tawa nung neplok.

¹¹Kechiaser kü indang angashirtemi ni moatsü; Aser ni angurtemi kü nem kuli agütsü;

¹²Kechiaser teyari meshir sensaker; Ano lajar, aser teyari malir, ni kümzük.

¹³Tesamar dang alir nungi temoatsüji kü dangi aru; Aser amitsür mulungjang nung ni tepela ken tendaktsü.

¹⁴Ni kü sasa temeshi sobu, aser iba jagi ni amokbang; Ni shitak o bendangbaji kü semoksü aser kolakjen liasü.

¹⁵Nükpoker tenükji ni liasü; Aser tsüngtsüker tetsüngji ni liasü.

¹⁶Sensaker dang ni tebu ama liasü; Ni meshiteter indangji ni bushitet.

¹⁷Tamajungpur tepu techiratemji ni tsüktoktsü; Aser pai mangema alirtemji ni pa tebang nungi agitet.

¹⁸Idangji ni ashi, “Ni kü tesep nung asütsü; Aser anogotemji lisem ama alitsü.

¹⁹Kü tera tzü nung ayanger; Aser ammang tepiyong kü kongsang nung azüngtsü ala;

²⁰Kü sentsüwangshi kü den tasen lir; Aser kü teka nung lijakji teti tasen alitsü.”

²¹Nisungtemi kü dang tenarong aten, aser ata; Aser kü kipok sayutsüngi angatsü ola madok.

²²Ni jembizüker külen parnoki ola madok; Aser kü o parnok den süoki ai.

²³Tzünglu aru ata ama parnoki ni ata; Aser tzükla tzünglu ata ama parnoki tebang tulu aka.

²⁴Parnoki kü o mamangdang ni parnok menütsü; Aser küjak tesangwa parnoki meshimakdaktsü.

²⁵Ni parnok lenmang tuyu aser kibur ama amen; Aser temeranger telok madak chuba ama ni ali; Oda mangyimertem süneptsür ka ama ni liasü.