Read njo YOB 3 Bible Online

YOB 3 - njo bible

YOB 3

¹ Ajiser Yobi tebang lapok aser pa asoba anogo atakatemtsü tenzük.

³Ni asoba anogo, aser aonung kobai “tebur ka soogo” ta ashi, aji sama-ang.

⁴Iba anogo tammang liang! Temalen nungi aji Tsüngremi tebushi, mesüra idakji tesangwa teyaloktsü.

⁵Tammang aser ammang temelem agi nembangjang, iba manung mepettem süloka lidakjang; anogo mangdaktsüba[5] agi aji tsübudakjang.

⁶Iba aonung yamai sang, tammang temelem agi aji sübangang. Küm anogo yongsük nung aji tetendaktsü; ita asükba nung aji tesükuk.

⁷Paonungji tapung liang, tepela ola idakji tangashidaktsü,

⁸Shirnoki anogotem atakatemer, shirnoki Leviathan[6] sakdaktsütsü renema lir.

⁹Züngia alidang anguba petinutem mangdakjang; tesangwa imla-a lidakjang saka aji tadokdaktsü, anepdang nüngjang sangwa tengudaktsü.

¹⁰Kechiba iba anogoi kütsü pok meshibang, mesüra künük dang nungi timtem memiimbang.

¹¹Kechiba ni tasodang masüaka na? Kechiba ni sozüklidang masüaka na?

¹²Kechiba temokok agi ni agizükar na? Mesüra kechiba ni ayongtsüsa mama aliar na?

¹³Kechiaser tangibo ni ontaker ajem-ajema lila; ni mejanger lila, idangjiang ni anisüngzük ngula süng;

¹⁴Alima nung chuba aser yimsüsür shirnoki pei asoshi lungki tulu yanglu, par den,

¹⁵mesüra, hon akar chubatem, shirnoki pei ki taribi agi sünga nangten,

¹⁶Mesüra ita mabensadang sor miima ayuba ama, oda kinüi kodanga tesangwa mangu medem süla sang.

¹⁷Idakjibo tamajungertemi joko merasar, aser angji tebelemertem anisüngzüka lir.

¹⁸Idakji puoka alirtem pei sünütsü asür; parnoki kibur ola mangashir.

¹⁹Idakji tilar o tulur na lir; aser kiburi kilir dang kecha mashir.

²⁰Kechiba toushi nung alir nem tesangwa, aser tanela nung kurema alir nem taküm agütsüaka na?

²¹ Parnoki tasü yongyar, saka aji marur; aser rema aliba rongsen dang tali aji tua bushir,

²²Parnoki kodang leper ngudir, parnoki kanga pelar aser lungsor.

²³Kechiba lenmang mungui alir nisung nem, aser Tsüngremi atsübanger alir nem, tesangwa agütsür aka na?

²⁴Kechiaser chiyungtsü shizüka ni anünger, aser tzü ayimba ama ni arrür.

²⁵Kechiaser koba ni tsübuseta ali, aji agi kü dak atonger. Aser ni kechi tsübua ali aji kü dangi arur.

²⁶Ni tiptem mali, ajemajema ka meliteter, mesüra ni anisüngzük maka, saka timtem arujen arur.