Read njo YOB 30 Bible Online

YOB 30 - njo bible

YOB 30

¹Saka tangbo kü dang tanubutemi ni sensatsür; Shir tsürabur ozü shiruru telok nung azüa memeyongi ni züngshi.

²Hau, parnok teka nung tashi aliba jagi kechi asütsü? Kechiaser parnok tashi ajak ogo.

³Kecha makaba aser ayaba nungi parnok kongrasüker; Parnoki ali takong achir, koba azüngmeyakdak aser pentok nung nemzür.

⁴Parnoki arem nungi süngo-lio metsükzüker; Aser kümpok teraji parnok chiyungtsü.

⁵Telok rongnungi parnok aridoker; Auür ka ama parnokji asa-a arishir;

⁶Lenten tarokdak, ongken nung, aser lungpok nung parnok alitsüla.

⁷Süngsem rongnung parnoki gado ama asar; Munger kübok parnok abangteper.

⁸Parnok suwar chirtem, hau, kita chirtem; Parnok linük nungi aridokogo.

⁹Saka tangbo niji parnok ken kümogo; Aser parnoki niji otsü ka küma tetshir.

¹⁰Parnoki ni sempar, parnoki ni nungi atsünga aor; Taochi makai küjak nung metsü metsüloktsür.

¹¹Kechiaser Tsüngremi kü lijak lisü salatsüogo, aser ni mak sütsüogo. Aser parnoki ni anema apusoogo.

¹²Ni anema kü tajichilen par tamajung teloki apusor; Aser parnok teraksa mapa agi ni anema nangbanger.

¹³Parnoki kü lenmang raksatsür; Ni ama teyarir malir ka parnoki lendong agi tongtsür.

¹⁴Tongti set rakpoka ayimba ama parnok arur; Teraksaji ajanga parnoki ni metsüngbanger.

¹⁵Tetsübutsütem kü dangi arur; Parnoki kü tenüng tajung mopung ama oner aor; Aser mepet ama kü rongsen jena aor.

¹⁶Saka tang kü tanela tzü ama kümogo; Timtem anogoi kü dak atonger.

¹⁷Aonung kü teret nungi shi shisar; Aser ni tashitsü atubaji tanena manener.

¹⁸Tashitak teshinem agi kü süoshi menentsür; Aji agi süoshi agi alen ama alener.

¹⁹Tsüngremi ni lishitsüngi nungoktsür, aser ni auyi aut ama kümogo.

²⁰Ni ne dang ayimtener, saka nai melangzür; Ni noktaker, saka nai ni merepranger.

²¹Nai kü dang maochi-i kümogo. Ne teka ain agi ni rishikangshir;

²²Nai ni ajungkettsür aser mopung manung sangdaktsür; Aser nai ni yipru nung metensatsür.

²³Kechiaser nai ni südaktsütsü, aser akümlir ajak asoshi atemzüka aliba atenshidaki anitsü ta ni metet.

²⁴Aji saka, laoya aliri teka memesangtsü ama? Mesüra lendong mapang nung kati teyari memeshili ma?

²⁵Timtem nung alir asoshi ni mejebka ma? Makar asoshi kü nela mejashika ma?

²⁶Saka ni tajung imla nung tamajung aru; Aser ni tesangwa ata nung tammang aru.

²⁷Kü poknüng menüngsar, aser koda malir; Tekangshi anogotem kü dangi aruogo.

²⁸Ni mang yima sünak abener tammang nung aor; Ni mungdang dak noktaker teyari meshir.

²⁹Ni shirongtem den adianu; Aser ostrich ozü tembar.

³⁰Kü teküp tanak akümer aser aji ajaker; Aser shirang aitba agi kü teret tsüktsüka akümer.

³¹Anungji kü tsürang kongki mangyim ken awar; Aser kü jemji jepteper ola ama apur.