Read njo YOB 31 Bible Online

YOB 31 - njo bible

YOB 31

¹Ni kü tenük den o züngtepogo; Ajangla kodaser ni aiür dak rangloktsü?

²Kechiaser temalen nungi Tsüngremi lemzüktsüba kü shilemji kechi? Mesüra azüklen nungi ajak Takoksangi agütsüba kü senmangji kechi?

³Memeshipur dangi lendong, aser temenen inyakba pur nem teraksa agütsür masü no?

⁴Pai ni taolen mangur ama; Aser kü tsüngsü ajak puteta mali ama?

⁵Ni tiyazü nung jaja-a lira; kü tsüngi kara kara-a ashioktsütsü oa lira;

⁶Toudangba shitak nung ni odangang; aser Tsüngremi ni shitakba nung noktaka ali asü mali ajidangang.

⁷Kü mera terü leni mejaka oa lira; Aser kü nükdang ajungleni kü mulungjang jaja-a lira; Aser kü teka nung langka tarak danga lira;

⁸Ajangla ni metsü prokdi aser tangari chidakjang; Aser ozü lu nungi adokba atsüdokang.

⁹Tetsür ka dangi kü mulung mesüoka lira; Aser ozü kidanger kikümdang ni mita lira;

¹⁰Ajangla kübutsü tangar lar kümdakjang, aser tangari la den mejangdakjang.

¹¹Kechiaser aji met tulu; Aser yimsüsürtemi merenshitsüba temenen mapa lir;

¹²Kechiaser aji Teraksatsüsang tonga mi agi arongtsüba lir; Aser ni züsentetba ajak rongdoktsüba lir.

¹³Ozü lar mesüra kilitsüri kü den o akadang, Ni parnok o mangai toktsüra;

¹⁴Tsüngremi o bendangtsü noktak dang ni kechi inyaktsü? Aser pai tasüngdangi arudang, ni kechi langzütsü?

¹⁵Shibai kütsü pok nung ni yanglu, pai pa-a meyangluka ma? Aser kati dang asenok tetsü pok nung meyanglu ama?

¹⁶Sensakeri aginüba ni langka danga sota lira; Mesüra amitsüri imla-a ataba magütsüi lira;

¹⁷Mesüra kü tsüta ni dang chia lira; Aser lajartemi aji mechishi-i lira;

¹⁸Ni lanuwa nungi tsürabur ama ni pa mesütet; Aser tasodang nungi ni amitsürtem anebalur.

¹⁹Süoshi makabayong kar tasür ta; Aser sensaker sobutsü maka ta, ni ngura;

²⁰Pa tenüktelen agi kü nem temoatsü magütsüi lira; Aser ozü san züng agi pa lemja melira;

²¹Obendangdak ni asemer lir ta meteta, ni lajartem anema teka mekanga lira;

²²Ajangla tapubangret nungi kü tapubang tongzüka ludakjang; Aser kü tepen teret kosükdakjang.

²³Kechiaser Tsüngrem nungi aruba lendongji ni asoshi tetsübutsü liasü; Aser pa akhüm agi ni kecha mesütet.

²⁴Ni honji kü teimla kümdakja lira; Aser hon temeja dang, “Ni ne dak temulung alemer” ta danga shia lira;

²⁵Kü rongsen ulu nung; Aser kü ket agi aika bena aru nung ni pela-a lira;

²⁶Ni anü apudang, mesüra ita jangja jangja ayadang aji ngua;

²⁷Kü mulungjang miima mesüzüka ora; Aser tebangi kü teka mesepra;

²⁸Ajia, yimsüsürtemi sen achitsüsa temenen mapa ka lir; Kechiaser yamaji süra, temalen aliba Tsüngrem ni menangzüker.

²⁹Ni sempar lendong angudang ni pela-a lira; Aser temenen agi pa atongdang ni joka tua pelara;

³⁰Hau, pa taküm atakatemjang ta, kü bang agi shia ni temenen menara;

³¹Par shi den shibai jangratema mechiyung? ta ozü süki nung alirtemi meshira;

³²Aenertem yimdong nung manen; Saka aener asoshi ni ozü ki lapok;

³³Tangar ama, kü teku nung kü menen miimbanga; Ni ozüng raksaba nembanga lira;

³⁴Kechiaser ni telok tuluji tsübu, aser kin kidongi sempaba ajanga ni aoksadaktsü; Anungji ola madok, aser kimai metugu;

³⁵Oh, kari danga kü dang angala sang! Ajiang, yangi kü temaitsü lir; Ajak Takoksangi kü dang langzüang; Aser kü tsükchiri ni anema züluba kaketji lila sang!

³⁶Atangji aji ni kü tapubang nung aputsü; Korang ka ama ni aji meketa alenloktsü.

³⁷Kü mera yongsük ni sayutsü; Chuba ka ama ni aji pa nem agütsüla.

³⁸Ozü li-i ni anema ayimtenra; Aser alu lar aliba ali jagi aroki jebra;

³⁹Idakji adokba temelen magütsüi ni chira; Aser ali kiburtem südaktsüra;

⁴⁰Tsük melen ai adokdakjang; Aser barley tsük melen tezüknem menemba ai adokdakjang. Yob o tembanger.