Read njo YOB 32 Bible Online

YOB 32 - njo bible

YOB 32

¹Anungji item nisung asemi Yob dang melangzüi anen, kechiaser pai pei sasa temeshi ta bilem.

²Idangji Ram kidong Buzai nunger Barakeler chir Elihui ain adok; Yob anema pa mit adok, kechiaser Tsüngrem dangbo pa ang shitak ta pai bilem.

³Ano pa tembar asem anemaka pa mit adok, kechiaser parnoki telangzüba shitakji mungutet, aser Yob taiji ya-a ta mesayutet.

⁴Tang Elihu Yob den jembitsü ata-a ali, kechiaser parnok pa dang tambu.

⁵Aser nisung asem bang nung telangzütsü mali ta kodang Elihui ajitet, pa mit adok.

⁶Aser Buzai nungba Barakel chir Elihui langzü; Ni tanur, nenok kanga tambur; Anungji ni tsübua liasü, aser nenok dang kü tebilemba kodakang mesayu.

⁷Ni ashi, “Tamburtemi jembiang, aser arishi talangpuri temetetba shisatsü sayuang.”

⁸Saka ashir-ashi nisung ka dak tanela ka lir; Aser pa dak ajak Takoksang tangula lir, aji agi parnok nem shisatsü agütsür.

⁹Tambura süra shisatsü akar masü, mesüra arishi talangpuri angatetera masü;

¹⁰Anungji ni ashir, “Kü dang angang; Nia kü tebilemba sayudi.”

¹¹Ajiang, ni nenok o ata-a liasü; Ni nenok tashir o anga-a liasü; Nenoki kechi jembitsü ta bushia alidang;

¹²Ni nenok dang tenarong tena liasü; Aser ajiang, nenok shingaia Yob taiji ya-a ta mesayutet, mesüra pai jembiba nenok rongnung shingaia melangzütet.

¹³Onoki tashi temetet nguogo ta shia lir kümdangang; nisungi masü Tsüngremi pa ludaktsütsü.

¹⁴Ibala o pai kü dang mashi; Aser nenok o agi ni pa dang melangzütsü.

¹⁵Parnok bangkar, parnoki joko melangzür; Parnoki tashitsü kecha mali.

¹⁶Aser parnoki mejembira, parnok ola madoki noktaka lira; Aser joko melangzüra, nibo odang ata-a alitsü na?

¹⁷Nia kü shilembo langzütsü, aser nia kü tebilemba ashitsü.

¹⁸Kechiaser ni o agi sünga lir; Tejembinü agi ni koda malir.

¹⁹Ajiang, kü tepok ya tapok mapaba meso mesüker; Yi meso tasen amato aji pokmadi asür.

²⁰Ni tangula sashitettsüsa kü nem jembidakjang; Kü tebangmechi lapokdakjang aser langzüdakjang.

²¹Ni ya mepishir, ni nisung shinga jaka mereprangli; Mesüra shinga nema ni tenüngsang magütsütsü.

²²Kechiaser ni tenüngsang magütsütet; Aji mesüra, kü Teyangluri ni yakta bener aotsü.