Read njo YOB 34 Bible Online

YOB 34 - njo bible

YOB 34

¹Ano Elihui maneni ashi;

²Nenok tashirtem, kü o angang; Aser nenok shisa akartem, kü dang tenarong tenang.

³Kechiaser temeli-i menakdangba ama, tenarongi o tendanger.

⁴Asenok asoshi kechi shitak lir aji asenoki shimdi; Kechi tajung aji asenok rongnung meteta yudi.

⁵Kechiaser Yobi shiogo, “Ni temeshi, aser Tsüngremi kü temeden rakzükogo;

⁶Ni shitak dang liaka, ni timatemer! Ni ozüng meraksai liaka, kü komo maneber ta.”

⁷Tesensatsüba tzü ajemba, Yob ama nisung shiba ali?

⁸Temenen inyaker den temba ayimba, aser tamajunger nisung den jajaba, pa ama shiba ali?

⁹Kechiaser pai shiogo, “Tsüngrem den putepa alitsübaji Nisung asoshi kecha tajangzük maka.”

¹⁰Anungji nenok tangatetertem, kü dang angang; Tsüngremi tamajung inyak ta, aser Ajak Takoksangi temenen inyaktsü ta, aji kodanga masü.

¹¹ Kechiaser nisung mapa yari pa nem taa agütsür; Aser nisung shia pei lenmang yari agütsür.

¹²Hau, atangji Tsüngremi tamajung meinyaker; Aser Ajak Takoksangi tiyazü mebendanger.

¹³Shibai pa ket nung alimaji agütsü? Mesüra alima ajak khu shibai pa nem benloktsü?

¹⁴Pai pa nela pei dangi shilangdaktsünüra; Aser pa tangula pei dangi anitenüra;

¹⁵Shi ajak külemi samatsü; Aser nisung auyisa akümtsü.

¹⁶Na tangatetba lira, ya angang; Kü ola angang.

¹⁷Shibai ochi sempar pai yimsü südi ma? Aser ochishir aser tashi taiter nai aitsütsü asü?

¹⁸Shibai chuba dang, “Na samesa!” ta, aser tamarener dang, “Nenok majung” ta ashir?

¹⁹Shibai chuba chir dang tejak merepranger; Mesüra sensaker dang tali takar mezüngshir? Kechiaser parnok ajak pai yanglubatem.

²⁰Aoksa-a, oda ayatrem nung, parnok asür; Takartem dak teka air aser parnok samar, aser tashi taitertem nisung teka meteni bener oadoker.

²¹Kechiaser nisung aolen pa tenük yoka lir; Aser pa tsüngsü ajak pai angur.

²²Temenen inyakertem atsüktettsüsa; Tammang mesüra ayatrem maka.

²³Kechiaser nisung ka Tsüngrem madangi okai aotsü asoshi; Pai anogo mezüngzüktsür.

²⁴O mebushi-i pai tashi taitertem ajasatsür; Aser parnok melen tangar toktsür.

²⁵Yamaji pai parnok mapa meteta lir; Aser aonung parnok meküpsaja menüngsatsür.

²⁶Pai mit agi tamajunger raksatsür; Aser ajaki repranga lia pai parnok dak azüker.

²⁷Kechiaser parnoki pa sülen manitak; Aser pa yimsü ka danga hau ta mali;

²⁸Oda sensaker ayimtenba pa dangi odaktsütsü; Aser makartem asaba pai angashitsüsa;

²⁹Pai tesünep agütsüra, shibai pa aitsütsü? Pai pa jak nembangra, shibai pa angutsü? Kin ka dang süaka, nisung ka dang süaka, saku dang;

³⁰Oda Tsüngrem metsüburi yimsü masütsü; Aser nübur asoshi sang malitsüsa.

³¹Kechiaser Tsüngrem dang ni temerenshi nguogo, “Ni joko tai memenatsü ta ashitsü asü?”

³²Ni manguba nai sayuang; Ni temenen menara, joko aji ni memenatsü, ta nisungi shiali ma?”

³³Nai bilemba ama pai taa agütsüdi ma? Ajagi nai aji magizüker; kechiaser ni masü, nai shimtsüla; Anungji nai kechi metet shiang.

³⁴Tangateter nisungi, kü dang ashir; Kü dang angaashiba tashir jagi kü dang ashitsü;

³⁵“Yobi kecha memeteti jembir, aser pa o tashir o ama masü.”

³⁶Yobi tatem tonga jembila sang jungla; Kechiaser pai tamajunger ama o langzür.

³⁷Kechiaser pa temenen dak alaka pai anema apusoba bendenloker; Onok rongnung pai teka matena atalar aser Tsüngrem anema o apoker.