Read njo YOB 36 Bible Online

YOB 36 - njo bible

YOB 36

¹Ano Elihui maneni ashi;

²Tatsüka ata-ang, aser ni ne dang sayudi; Kechiaser Tsüngrem melen ni ano tashitsü tera lir.

³Talang nungi ni kü shisatsü bener arutsü; Aser ni kü Teyanglur nem temeshiba agütsütsü.

⁴Kechiaser atangji kü o tiyazü masü; Shisatsü nung teperibaji ne den lir.

⁵Ajiang, Tsüngrem tashi tait, aser shinga mezüngmeshi masür; Pa tangatetba tashi nung kanga tulu.

⁶Pai tamajunger taküm metoktsür; Saka timtemer nem par tim agütsür.

⁷Temeshipur nungi pai pa tenük mechioker; Saka chuba menden nung chubatem den pai parnok teti lidaktsür, aser parnok tudaktsür.

⁸Aser pai parnok tsüngden chiokra, aser parnok timtem lisü nung pura;

⁹Idangji pai parnok mapa sayur; Aser asüküm inyakogo ta parnok ozüng raksaba sayur.

¹⁰Ano tesayutsü angatettsüsa pai parnok narong lapoktsür; Aser parnok temenen nungi meyipang ta ozüng agütsür.

¹¹Parnoki pa dang angara, aser tenzükra, parnok anogo azükaru nung, aser parnok küm tepela nung süitsü.

¹²Saka parnoki mangara, parnok nok agi samatsü; Aser shisatsü mungui parnok samatsü.

¹³Saka shiri Tsüngrem metsübur, parnok mulung nung ain-apung bendener; Pai parnok alenaka parnoki teyari majar.

¹⁴Parnok asangwa alidang asür; Aser parnok taküm maksü nung atemer.

¹⁵Pai timtemertem parnok timtemba ajanga kümzüker; Aser toushi ajanga parnok narong lapoktsür.

¹⁶Hau, lendong nungi pai na mesüzüka; Temesü malidak tesademdaki anir ola, aser na chiyungba langbang nung kechi toktsür aji temo dang süla.

¹⁷Saka na tamajunger obendangba agi sünga lir; Obendangba aser ochiba agi na tonga lir.

¹⁸Kechiaser mit adokba agi na mesüzüka atalar ka küma lira, kümdangang; Aser talangzükba tulu agi na mashileni tuodaktsü.

¹⁹Timtem makai iba denji ne rongsen kasa südi ma? Mesüra tashi ajak den kasa südi ma?

²⁰Aonung teyongya, koba mapang nung kintem parnok talidak nungi leptoker.

²¹Kümdangang, temenen leni tuo; Kechiaser nai timtem dangbo temenen ang shimogo.

²²Ajiang, Tsüngremi pa tashi nung majettsüsa inyaker; Pa ama tesayur shiba ali?

²³Shibai pa nem pa teinyaktsü lemzüktsü? Aser shibai, “Nai tai inyakogo” ta shitet?

²⁴Pa mapa tushia uludakjang; Koba indang nisungi ken atener.

²⁵Nisung ajaki aji reprangdagi; Nisungi aji talang nungi angur.

²⁶Ajiang, Tsüngremji tulu, aser asenoki pa memetet; Pa küm kwi aji memetet.

²⁷Kechiaser pai tzüyim nungi tzüjang mesepketer; Pai itemji tzüsü nungi tzünglu küma yanglur.

²⁸Koba anüngi tsükdaktsür; Aser nisung madak talubosa ludaktsür.

²⁹Hau, mepet alungba, aser pa süki tsüngmok atenba; Shibai angatettsü akok?

³⁰Ajiang, pa meketa pai tsüngpret yoker; Aser tzüyim tarokdak aji agi sübanger.

³¹Kechiaser item ajanga pai kintem mesür; Pai chiyungtsü talubosa agütsür.

³²Teka anaprongla agi pai tsüngpret amer; Aser ajioka ayudak alatsü pai ozüng agütsür.

³³Tsüngmok jagi pai rasaba sayur; aser yipru agi pa mit sayur.