Read njo YOB 37 Bible Online

YOB 37 - njo bible

YOB 37

¹Yagi kü mulungjanga atentener, aser iba talidak nungi juka aor.

²Pa ola asaba, aser pa tebang nungi adokba ola, nenoki angang.

³Kotak kübok ajakleni pai aji yoker; Aser alima tatem tashi pa tsüngpret yoker.

⁴Iba sülen pa ola arrür; Ola tulu agi pai tsüngmok atener; Aser pai tsüngprettemji sota mayur; Pa tebang nungi pa ola angashir.

⁵Tsüngremi pa ola agi tesüngmangtsüka tsüngmok atener; Asenoki mangatetba mapa tulu pai inyaker.

⁶Kechiaser pai rürjep dang ashir, alima nung tsükang; Ano tsüngsak aser tzünglupu dang, “Tashi itshiang ta ashir.”

⁷Pai nisung shia teka anendaktsür; Oda nisung ajaki pa mapa metettsüsa.

⁸Idangji shirurutemi temejangdaki aor, aser parnok leprungki nung anisüngzüker.

⁹Pei taktang nungjagi Tsüngrem mopung adoker; Aser prokshia aliba mopung nungi temokong adoker.

¹⁰Tsüngrem tangula agi rürjep lung yanglur; Aser tzüyim lentenji mesüa kümtsür.

¹¹Hau, pai mepet temelemji tayi agi süngtsür; Aser mepeti pa tsüngpret prokshidaktsür.

¹²Aser nisung aliba lima nung, pai kechisa meladir pai inyaktsü asoshi; Ibaji ileni khen, küleni khen, ta pa sasa anishia meketzür.

¹³Alima meimchir metongshitsütsü asoshi, mesüra temeim agi pai aji adokdaktsür.

¹⁴Oh Yob, ya angang; marakzüi noktakang; Aser Tsüngrem tesüngmangtsü mapa bilemdangang.

¹⁵Tsüngremi parnok madak kodaser pa mapa lemsar; Aser mepet tesangwa koda ayar nai meteter ma?

¹⁶Mepettem kodaser timi alir; Aser shisatsü nung teperisangi tesüngmangtsü inyakba meteter ma?

¹⁷Anüolentip mopungi alimaji mokonga alidang; Nenok süoshi talem lidi ma?

¹⁸Nai pa ama tanüdangtsü temelem mesüka anüngtem mesangshia yanglutetdi ma?

¹⁹Asenoki pa dang kechi ashitsü aji kü dang shiang; Kechiaser mashi-malu aliyong asenoki asen o tatongi shia magütsütet;

²⁰Ni jembitsüa ta pa dang shidisü? Mesüra, ni meyokadokang ta nisungi shia ali asü?

²¹Aser tang nisungi anüngtem tesangwaji mejangjai angur; Saka mopung ona itemji süshia odaktsür.

²²Anüdoklentip nungi sentsüprang tesangwa arur; Tsüngrem dak tetsübutsü sentsü lir.

²³Ajak Takoksang, asenoki pa mebushitet; Ain aser obendangba nung pa tashi tulu; Aser temeshiba agi sünga ali nung, pai tai mebendanger.

²⁴Anungji nisungi pa tsübur; Shibai temulung nung tashir ta bilemer pai aji züngshia mali.