Read njo YOB 38 Bible Online

YOB 38 - njo bible

YOB 38

¹Idangji yipru mopung nungi KIBUBAi Yob dang langzü;

²Kecha memetetba o agi kü tebilemba miimbangba ya shiba?

³Tashikar ka ama nai tang pei nangri kangang; Aser ni ne dang asüngdangtsü, aser nai kü dang shiang.

⁴Ni alima yangerdang na kong liasü? Nai meteta lira shiangjong; Ne dak tangatetba lira shiangjong.

⁵Nai metet süra, shibai iba tasazükba renem? Mesüra shibai iba manung lisü mesang?

⁶Iba tongshitemji kong azüng; Mesüra iba kinük lung shibai atem?

⁷Kodang anepdang petinutem külemi ken aten; Aser Tsüngrem chir ajaki tepela nung ayimten?

⁸ Mesüra kodang ali nungi pokteta adok; Shibai tzüyim nung kishiji shibang?

⁹Kodang iba semoksü asoshi ni mepet yanglu; Aser iba temeibangba kinü sü mepet temelem yanglu;

¹⁰Aser aji asoshi arrtsü yanglu; Aser kishi aser tartangba yanglu,

¹¹aser ashi, “Ya tashi na arutet, saka ya tashi dang, aser ne asükümba yangi anentsü.”

¹²Sozükli nungi tang tashi nung nai anepdang ozüng mela ama? Mesüra koba mapang nung züngia akümtsü aji nai pa dang shiogo ma?

¹³Oda aji agi alima tatem ajak ambangtsü asoshi; Aser idak nungjagi tamajungerji rüktoktsüsa;

¹⁴Süng agi atep nung ajongli melenshiba ama aji melenshir; Aser osak nung sü aremba ama akümer.

¹⁵Tamajunger dang nungi tesangwaji sota ayur; Aser asükümba tepenji raksar.

¹⁶Tzüyim apokdaki na aruogo ma? Mesüra tarok-tenem nung jajaogo ma?

¹⁷Tasü süngkhümtem ne dang sayuogo ma? Mesüra tammangdak kishitemi nai ngudangogo ma?

¹⁸Nai alima tasazük meteta yuogo ma? Nai aji ajak metetra, shiangjong.

¹⁹Tesangwa yaloktsüdak kong nungi arur aser tammang talidak kong lir?

²⁰Aji nai arrtsü tashi agitsüsa aser aji lenmang ngutettsüsa;

²¹Tesangwa kolen lir, kechiaser idangji na sor liasü; Aser na arishi kanga talang!

²²Rürjep rizüngdaki na yidangogo ma? Mesüra rürjep lung jendang nguogo ma?

²³Koba ni timtem mapang asoshi renema ayu, Kintem rara aser tongbang mapang asoshi renema ayu.

²⁴Mopung lemsadak, aser alima nung anüdoklen mopung prokshidak, lenmangji kolen?

²⁵Tzünglu alutsü asoshi lenmang shibai chipok; Mesüra tsüngmok tsüngpret asoshi lenmang shibai pipok?

²⁶Nisung malidak aser azüngmeyakdak tzünglu arudaktsütsü asoshi;

²⁷Ali teraksa dak aser tamajungdak tenladaktsütsü asoshi, aser ali takongdak ai lanu meidaktsütsü asoshi;

²⁸Tzünglu tebu ali asü? Ajangla aonung shibai azüngtzüjang aludaktsür?

²⁹Shiba pok nungi rürjep lung adok? Aser anüng nung tzüsü temokong shibai poktetdaktsü?

³⁰Lung ka ama tzüji telong akümer, aser tarokdakji nembanger.

³¹ Pleiades petinu tejepji nai alen asü? Mesüra Orion lisüji nai sala asü?

³²Nai Mazzarotji pa tsüngkhüm nung adokdaktsür asü? Mesüra Arcturusji par chirtem den nai anishir?

³³Nai anüng ozütem metet asü? Alima nung ozüngji nai yanglur asü?

³⁴Tzünglu bulua arudaktsütsü asoshi, nai mepet dangi ola tashi agi yoker asü?

³⁵“Tsüngpretji oang” ta nai melar asü? Aser parnoki ne dang, “Onok yangi lir” ta ashi asü?

³⁶Telunglen shibai shisatsü enok? Mesüra shibai temulungjang nung tangatetba agütsü?

³⁷Tashi temetet agi shibai mepetji züngdangtet? Mesüra shibai anüng tzüshi izüktet?

³⁸Aliji merang ama meranga akümdang; Aser likongtem külemi mejatepa akümdang.

³⁹Molusongzü tetsüdi asoshi nai shi bushidi ma? Mesüra molusongzü pungtu tepok süngtsüdi ma?

⁴⁰Molusongzü pei lungpok nung mejanga alidang; Aser mür nung mita alidang?

⁴¹Waro chanutemi taya nung chiyungtsü atema kü dang ayimtendang; Parnok ayaba nai süngzükdaktsütettsü asü?