Read njo YOB 4 Bible Online

YOB 4 - njo bible

YOB 4

¹Idangji Teman nungba Elifazi langzü;

²Kati ne den jembidi süra nai jashidi ma? Saka shibai mejembi-i litet?

³Ajiang, nai koda aika sayuogo, aser tashi maiter nai yariogo;

⁴Laoa alir ne o agi mesoogo, aser temokok nung tashi maitertem nai tashi ittsüogo.

⁵Saka tang ya ne dak atong nung na lular; iba agi ne dak kongshi nung nai maremer.

⁶Nai Tsüngrem tsübuba dak temulung alemer südi? Aser nai shitak noktakba nung teimla akar südi?

⁷Ya bilemtetang ta ni ne dang mepishir, tai makar shibasa sama? Mesüra tindanger kongsa jentok?

⁸Ni ngua arubabo, shirisa temenen lu inyaker aser tamajung metsü proker, parnoki aji arur.

⁹Tsüngrem tangula agi parnok samar. Aser pai mit adokba agi parnok meyokadoker.

¹⁰Molusongzü, arrürba, molusongzü tesashi ola, aser molusongzü atura tepu, item raksar.

¹¹Shi tachitsü manguba yong, molusongzüji samar aser molusongzü techanutemji tangalen prokshir.

¹²Tang kü dangi ola ka tanemi arur, kü narongi aji tera ajepzük.

¹³ Aonung mangdang bilema alidang, Teyiprung mapang nung,

¹⁴Atentena kü dangi tetsübu aru, koba agi kü teret ajak anokshidaktsü.

¹⁵Idangji kü jakdang tanela ka süi; ni ku meronga adok.

¹⁶Ibaji marakzüi noktak, saka pa komama ni majitet; kü nükdang langka mesüka angu; aser ni ola tila ka angashi.

¹⁷Tsüngrem madang tasütsüba nisung meshia litetdi ma? Pei teyanglur madang merüka litetdi ma?

¹⁸Ajiang, pei tenyar dak pai temulung malemer; aser pa kotak tenyartem tai apur;

¹⁹Ajangla lishi ki nung alir. Shir kimung auyi manung lir, koba tarütsü agi raksar, parnok koda züngshitsü?

²⁰Manger mesangwa dang parnok ajasa aor; shingaia hau ta meli-i parnok samar.

²¹Parnok süki lisü lokdokra parnok asür masü no? Aser ajia temetetba makai dang asür masü no?