Read njo YOB 40 Bible Online

YOB 40 - njo bible

YOB 40

¹Ano KIBUBAi Yob dang ashi;

²Shibai tenüng asener pai ajak Takoksang den toktepdi ma? Shibai Tsüngrem den o ashishiteper, pai aji langzüang.

³Idangji Yobi KIBUBA dang langzü;

⁴Ajiang, ni kecha malang; Ni ne dang kechi langzütsü? Ni kü bang nembangdi.

⁵Ni khen jembiogo; Hau, anaben tashi, saka ojang, ni melangzütsü.

⁶Idangji KIBUBAi Yob dang yipru mopung nungi langzü;

⁷Tashikar ama ne nangri kangang; Ni ne dang asüngdangtsü, aser nai kü dang langzütsü.

⁸Nai koda kü o bendangba mezüngshitsü asü? Na metentsü mechi nai ni aitsütsü?

⁹Mesüra Tsüngrem tepen ama ne dak aket asü? Aser pai ola tulu agi tsüngmok atenba ama nai akok asü?

¹⁰Kwa, na akhüm keta sobudangangjong; Aser sentsüpranga süoshi abendangangjong.

¹¹Ne ain adokbaji tera tali lidakjang; Aser shirsa asükümer, ajak dak rangloka parnok ludakjang.

¹²Asükümer ajak dak rangloka, parnok ludakjang; Aser tamajungerji parnok noktakdak nungi ajemzüka yokang.

¹³Auyi nung parnok külemi nembangang; Manguba lima nung parnok tejak meyibangang.

¹⁴Idangjiang nia na asangtsü; Oda neka tajichi agi takok ngura;

¹⁵Tang kentok, shiruru tulubaji ajiang, koba na ama ni yanglu. Nashi pungchi ama pai rem achir;

¹⁶Pa tashi teperem nung lir; Aser pa ainji pa tepok tetsü nung lir.

¹⁷Cedar süng ama pa teben arakzür; Pa tepi tetsüji telong lungteta lir.

¹⁸Pa teret yongmenyin ama; Pa tetsüng, tepen merang jok ama.

¹⁹Tsüngremi yangluba rongnung pa tongtiba; Shibai pa yanglu pai dang nok agi azüokteter.

²⁰Kechiaser tenemi chiyungtsü pa nem adokdaktsür; Idakji shiruru ajak asayar.

²¹Lapu naro kübok kümpok rongnung, aser lishitsüng nung pa mejanger;

²²Labu naro dong agi pa akhümbanger; Ayongbang narotemi pa meketjema lir;

²³Ajiang, ayong ka tzü metsüngra, pa maoksar; Yordan ayong pa tebang tonga metsüngaka, pa temulung lema lir.

²⁴Pai mita alidang kari danga pa pudi ma? Mesüra, merang sang agi pa teni ateta tsüngtetdi ma?