Read njo YOB 41 Bible Online

YOB 41 - njo bible

YOB 41

¹ Nai ango boroki agi molutzürang atsütetdi ma? Mesüra pa temeli lisü agi nemzüka yoktetdi ma?

²Nai pa teni nung süngzü rüoktetdi ma? Mesüra boroki agi pa teküm tupoktetdi ma?

³Pai ne dang aiben mepishidi ma? Mesüra ne dang o tanep jembidi ma?

⁴Nai teti asoshi kilir agiang ta, pai ne den tezüngzüktepba yangludi ma?

⁵Ozü ka den asayar ama nai pa den asayadi ma? Mesüra ner aiürtem asoshi sendaka yudi ma?

⁶Angopur teloki pa jenjang tangdi ma? Shishir rongnung parnoki pa lemsadi ma?

⁷Merang taju agi nai pa teküp tsüngsatetdi ma? Mesüra pa tekolak ne angotsüngtsü agi tsüngtetdi ma?

⁸Nai pa dak tekongshi danga kongshidangang; Aser koteka raratsü bilemdangang; nai pa dak mekongshitettsü,

⁹Ajiang, pa dak kongshiang; teimlatsü maka; Pa tangudang angu nunga pa tsübur.

¹⁰Pa dak shingaia mekongshitettsüsa pa kanga tesashi; Ajangla shibai kü tsüngdang noktaktet?

¹¹Shibai kü den toktep aser ni shiba majet? Anüng ajonga teküboklen kechisa ali aji kü meyong.

¹²Pa tetsüng-tepen, pa tashi tulu; Mesüra pa asoajen tajung indang ni mejembi-i malitsü.

¹³Shibai pa temaba sü semzüktet? Pa teküp temelem anasa shibai arutet?

¹⁴Shibai pa tebang kishitem lapoktet? Pa tepu meketa tetsübutsüka lir.

¹⁵Pa terongdong jong ama tip temelem agi, akang akanga mejatepa lir.

¹⁶Tetsüngdai mopung teraka maitsüsa kati ka den tsüngtepa lir.

¹⁷Itemji kati ka den metentepa lir; Melepsatettsüsa itemji atongtepa lir;

¹⁸Pai hachi ta asüdang milak adoker; Aser pa tenükji anepdang anümerem ama.

¹⁹Pa tebang nungi mi adoker; Aser mitsü apoker.

²⁰Mimung nung chipo jaa atu ama; Pa teni nungi mokozü adoker.

²¹Pa tangula sashidang mijang nung mi aputeter; Aser pa tebang nung milak jangrur.

²²Pa tashi pa tekong nung lir; Aser pa tsüngdang tetsübu tsüngsanger.

²³Pa shi tetsütem ka küma metentepa lir; Itemji akang akanga aser meraksatsüsa lir.

²⁴Pa mulungjang lung ama temerang; Hau, lungzük ama temerang.

²⁵Pa aramesodang tashikartem tsübur; Tatenten agi parnok mangmanger.

²⁶Nok agi pa dak lepoka mair; Mesüra nü agia, lijakjang agia, aser merang taju agia kecha masür.

²⁷Pai merangji monü ama, aser yongmenyinji süng tap ama züngshir.

²⁸Lijakjang agi pa maridokteter; Lungtema süngjok ama akümer.

²⁹Süngten agi merepbaji modong ama züngshir; Aser nü tsükdaktsüdang menütsür.

³⁰Pa tepoklen porep techira ama lir; Lishi nung pa mejangdakji motsüngnem yanglu ama taren taren lir.

³¹Tarokdakji pai po ka ama jaa atudaktsür; Pai tzüyimji totzü ama kümdaktsür.

³²Tarokdakjia mesüngdaktsü amato, pa sülen pai lenmangji sentsüpranga adokdaktsür.

³³Alima nung kecha metsübuba; Pa ama shiruru kecha yanglua mali.

³⁴Pai temabatem dak metsübui rangloker; Asükümba chir ajak madak pa chuba lir.