Read njo YOB 42 Bible Online

YOB 42 - njo bible

YOB 42

¹Idangji Yobi KIBUBA dang langzü;

²Nai ajak inyaktet ta; Aser ne tebilemba kecha sota meyutet ta ni metet.

³ Shisatsü makaba o agi Tsüngrem tebilemba miimbangba ya shiba? Anungji ni mangateti jembiogo aser ni memeteti tesüngmangtsü indang jembiogo.

⁴ Yimlibilema angang, aser ni jembidi; Ni asüngdangdi, nai kü dang sayuang.

⁵Kü narong agi dang ni ne indang angashi; Saka tangbo kü tenük agi na angur.

⁶Aji asünung, ni kü sasa ni aitsür; Aser auyi aser aut manung mena ni temulung meyiper.

⁷Yamai adok, KIBUBAi Yob dang jembizüker külen, KIBUBAi Teman nungba Elifaz dang ashi, “Na anema, aser ne temba ana anema, ni ain adoker, kechiaser Yobi jembiba ama kü indang kechi tim aji nenoki mejembi.

⁸Aser tang, nashi pungchi tenet aser nabong tepung tenet bener kü kilir Yob dangi oang, aser nenok asoshi tarongba tenla tenla-ang, aser kü kilir Yobi nenok asoshi sarasademdakjang; kechiaser ni nenok den maochi-i mebenshitsüsa ni pa sarasadem agizüktsü; kechiaser kü kilir Yob ama, kü indang kechi tim aji nenoki mejembir.”

⁹Teman nungba Elifaz, aser Shuhai nungba Bildad, aser Namat nungba Zofar oa KIBUBAi ashiba ama inyak aser KIBUBAi Yob sarasadem agizük.

¹⁰Yobi tembar asoshi sarasademtsür külen, KIBUBAi Yob tia melenshitsü; aser KIBUBAi Yob mezüng akaba ajak anasü agi tali agütsü.

¹¹Aser par adianu ajak aser pa aianu ajak aser mezüng pa shiteter ajak aru aser par kidang pa den chiyung; aser parnoki pa den tejashi lemsatep aser KIBUBAi pa dak tamajung tongdaktsüba ajak asoshi süneptsü; aser parnok nisung shiai sen terara aser hon angoti kaka agütsü.

¹²Aser KIBUBAi Yob taküm mezüng dang nungi tesü tali moatsü; aser yamaji san meyi terpezü, ut meyi trok, alu alaba nashi pungchi jura meyi ka, aser gado tsüla meyi ka ta pa meyong aküm.

¹³Par jabaso tenet aser jala asem liasü.

¹⁴Aser pai tantsüla tenüng Yemima aja, tanabula Kezia aja, aser tasembula Keren-happuk ta aja.

¹⁵Aser Yober jala ama alima nung tobur tajung tetsür shinga mali asü; aser parnok tebui par tedi nunger den senmang agütsü.

¹⁶Yaser Yob küm noklang ka ser lir taküm ali, aser putu pezü tashi par chir aser semchir angu.

¹⁷Aser Yob anogo tabensa nung tambur kümer asü.