Read njo YOB 5 Bible Online

YOB 5 - njo bible

YOB 5

¹Shisadangang jong; ne dang langzütsü kar danga ali asü? Aser temeshipur shiba dangi na aotsü?

²Kechiaser tamashir pesaprung agi süngdaktsür, aser tongmelanger tenükmerem agi tepseter.

³Tamashirji ni tera ayangba angu; saka aoksa-a pa talidak atakatem,

⁴Par chirtem lendong nung lir, aser süngkhüm nung parnok menüngreper, aser parnok kümzükera shinga mali.

⁵Parnok aluruba yaseta alirtemi chimatsür, aser sensakertemi tsükjong bener aor, aser tzürartemi par tzübu nung tzü atar.

⁶Kechiaser ali nungi tekangshi madoker, mesüra ali nungi timtem mapoker;

⁷Saka mitsü azüki yimketa atu medem to nisung timtemtsü soa lir.

⁸Saka ni ka asübo, ni Tsüngrem bushila, aser kü o indang Tsüngrem nem agütsüla;

⁹Pai mangajemba mapa tulu inyaker, aser mezüngteti tesüngmangtsü mapa inyaker;

¹⁰Pai alima nung tzünglu agütsür, aser alu nung tzü yoker;

¹¹Tekübok tia alir pai temaleni ajungkettsür, aser mangyimer tejenbu leni tudaktsür.

¹²Parnok tebilemba parnoki matongtsüsa, tesangra nisungi tasa asaba pai raksatsür.

¹³ Pai tashirtem parnok pei tasa nung apur, aser teraksar tebilemba belensatsür.

¹⁴Anüngdang parnoki tammang ajurur, aser aonung ama parnoki teruto nung ajemzüa senzür.

¹⁵Saka parnok tebang nok nungi sensakertem aser tashi taiter teka nungi parnokji pai kümzüker.

¹⁶Aji asü nung sensaker teimlatsü kar, aser ochimashir tebang nembangtsür.

¹⁷ Ajiang, Tsüngremi shiba arütsür, iba nisung tepelatsü; anungji ajak Takoksangi merenshiba mezüngmeshi tesü;

¹⁸ Kechiaser pai ayako tendaktsür, aser paisa anebtsür. Pai yirutsür, aser pa teka agisa anebtsür.

¹⁹Lendong trok nungi pai na kümzüktsü; hau, tenetbuba nung na kecha masütsü;

²⁰Ayawara, tasü nungi, aser rara nung nok ain nungi, pai na alangzüktsü.

²¹Temeli wara nungi na atsükadoktsü, aser tesamaba arudang nai metsübutsü.

²²Tesamaba mapang nung aser ayawara nung nai menütsü; mesüra alima arem shirurutem nai metsübutsü.

²³Kechiaser alu nung lung den na lungjemtsü, aser ne den arem shiruru yimjung nung alitsü.

²⁴Aser ne süki meraksai lir ta nai metettsü; aser nai ne talidak semdangtsü aser ajak abensa-a angutsü.

²⁵Ne metsü ulutsü ta nai metettsü, aser alima nung ai ama ner chirtem alitsü.

²⁶Mendi tashi kümerang asükba medem, na tambur kümerang lepi aitsü.

²⁷Ya ajiang, onoki bushitetba ya shitak lir; onoki angadangogo, aser na ajungtsü asoshi aji meteta yuang.