Read njo YOB 6 Bible Online

YOB 6 - njo bible

YOB 6

¹Idangji Yobi langzü;

²Oh kü pesaprung ya odangla sang, aser kü timtem ajak seret nung odangla sang!

³Kechiaser tzüyim lisem dangbo taretba asütsü; abenji ni o mashi-i jembiogo.

⁴Kechiaser ajak Takoksang lijakjang, kü dak janga lir, iba mim kü nelai jemdar; Tsüngrem tetsübutsütem ni anema noktaka lir.

⁵Arem gadoi pa rem aka dang asadi ma? Mesüra nashi pungchi-i pei chiyungtsü yur asadi ma?

⁶Kechi aon manang aji metsü meteni chiteter ma? Mesüra entsü temesüng dak tanang chiteter ama?

⁷Kü bangi item metangshinür; itemji ni asoshi talaktsü lir.

⁸Oh ni aginüba ngutetla sang, aser ni yongyaba Tsüngremi melala sang!

⁹Aser ni lensettsü Tsüngremi mulungla sang, aser pa teka sala-a ni jentokla sang!

¹⁰Idangjiang ni tesünep ngula; hau, mapayuba tekangshi nung ni pelala; kechiaser Temeshiba otem ni menangzüki mali.

¹¹Ni atasatsüsa kü tashi kong ali? Aser ni aremzüktetaka timtem ya kong atemtsü?

¹²Ni lung ama tashi ait asü? Mesüra kü shi ya merang asü?

¹³Kü dak lenmang kecha mali masü no? Aser kü dak nungi inyaktettsü tasa aridokadoker masü no?

¹⁴Shiri pei tembar asoshi temeim sota ayur, pai ajak Takoksang tsübuba sendoker.

¹⁵Ayongnu ama, aser aji tayimdak sama-a aoba ama, kü adianutemi külaka benshiogo;

¹⁶Rürjep lung agi item ayongnu nakrema akümer, aser item manung rürjep aremer.

¹⁷Kodang lema kümdir, parnok samadoker; kodang tsüka kümdir, parnok tangula kümadoker.

¹⁸Aeni aor telok lenmang aia aor; parnoki aremi oa samar.

¹⁹Tema nunger aeni aor teloki tzü bushir; Sheba teloki imlar.

²⁰Parnoki imla-a aliba mangu nung parnok mak asü; parnok ajagi aru, aser mangmangadok.

²¹Yamaji nenok kü madang kümogo; nenoki kü timtem angur, aser tsübur.

²²Kü nem langka kua, mesüra nenok rongsen nungi sempet ka agüjang, ta ni ashi asü?

²³Mesüra, tsükchir ket nungi ni kümzükang ta, mesüra rishikangshir ket nungi ni alangzükang, ta ni ashi asü?

²⁴Kü dang sayuang, ni mokorai lidi, aser ni kong aibelener aji angatetdakjang.

²⁵O shitak koda tashi tait; saka nenoki arütsüba nung kechi tashi ali?

²⁶Koda masüba nisungi jembiba oji mopung ama ta bilemaka, nenoki arütsütsü atonger na?

²⁷Hau, nenokibo lajartem dak an toktangtsü; aser tembar ka dak tajangzük achitsü.

²⁸Saka tang, kü dak ranglokang; kechiaser shitak ni nübur jakdang meyazütsü.

²⁹Ojang sang ta ni mepishir, tamajung tagütsü; hau, nenok temulung melenshiang, ni ano meshimeshia lir.

³⁰Kü meli nung memeshiba ali asü? Nibo tajung tamajung mechitettsü asü?