Read njo YOB 7 Bible Online

YOB 7 - njo bible

YOB 7

¹Alima nung nisung asoshi rara mali asü? Pa takümji ayanger anogo memesük no?

²Alari akhümpok aginüa yongyaba ama, aser ayangeri taa dang yongyaba medem to,

³Ni itasa ita tazüngla dang lidaktsür, aser ni asoshi aonung tuokrongtsü lemzükja lir.

⁴Kodang ni ondaker, ni ashir, “Ni Kodang shishitsü?” Saka aonung talang lir; aser anepdang züngia tashi ni kü mang meyipshijen meyipshir.

⁵Kü mang mesen aser arü agi sünga lir; kü teküp meranga akümer, ajiser tenpoker;

⁶Kü anogo sütaker süksen dang nungi tekaraba aor, aser teimla makai akümer.

⁷Oh, kü taküm ya tangula ta bilemtetang; kü tenük agi joko tajungbo mangutsü.

⁸Shiba tenük agi ni anüker, pai joko ni mangutsü; ne tenük agi ni bushitsü, saka nibo malitsü.

⁹Mepet mungui samadokba medem to, shiba lepi idir joko pa madoktsü.

¹⁰Joko par kidangi pa meshilangtsü, mesüra pa talidakia pa meshitettsü.

¹¹Anungji nia kü bang meshibangtsü. Ni kü nela okrongba indang ni jembitsü, aser kü nela taku indang ni nemnemtsü.

¹²Miter nem mitdaktsütsüsa; ni tzüyim asü, mesüra tzüyim shiruru asü?

¹³Kü yipteni ni süneptsütsü, kü mejangdaki kü taochi tera jungtsütsü ta kodang ni shidir;

¹⁴Idangji nai pungmang agi ni aoksatsür, aser mangdang ajanga ni tsübudaktsür;

¹⁵Anungji kü nelai lensetakang sünür; aser ni timtem dangbo tasüang sünür.

¹⁶Ni kü taküm agi lakogo; ni tetibo malitsü; ni odang tokjang, kechiaser kü taküm tangula dang,

¹⁷ Nai ulutsütsüsa; aser nai pa dak temulung agütsütsüsa, nisunga kechi?

¹⁸Aser anepdang shia nai semdangtsüsa, aser mapang shia tendangtsüsa, nisunga kechi?

¹⁹Kopiga na kü tsütsü tejak mashitsü; mesüra ni metsü meyok matatettsü?

²⁰Ni temenen mena süra; Oh na nisung tanüker, ni ne dang kechi inyaktsüla? Ni kü sasa khuret abentsüsa; kechiba nai ni tenük yokdak kümdaktsü?

²¹Aser ni ozüng raksaba tai kechiba matoker aser kü menen kechiba bener maor? Kechiaser tang ni auyi nung mejangtsü; aser nai ni rongjena bushitsü, saka ni malitsü.