Read njo YOB 8 Bible Online

YOB 8 - njo bible

YOB 8

¹Idangji Shuhai nungba Bildadi langzü;

²Kopiga nai itemi jembitsü? Aser ne o mopung tesashi ama kopiga alitsü?

³Tsüngremi obendang belensatsür asü? Mesüra ajak Takoksangi ochiba belensatsür asü?

⁴Ner chirtemi pa anema temenen mena süra, ajangla pai parnok tai asoshi merenshiogo.

⁵Nai dang temulung agüja Tsüngrem bushira; aser ajak Takoksang dang mepishira;

⁶Na temerük aser tindang lira; atangji pai na tepu akümtsü, aser ne temeshiba talidak shia agütsütsü.

⁷Aser na tila ka agi tenzükaka, na tesü-tatem nung jenti arentsü.

⁸Kechiaser ni ne dang mepishir, alemli putupur dang asüngdangang; aser par tsüraburi kechi bushiteta aru, aji ne sasa tendangang.

⁹Kechiaser asenokbo yashi chir dang aser kecha memetet; kechiaser alima nung asen takümji akhüm ka ama dang.

¹⁰Parnoki ne dang mesayuli ma aser meshili ma? Aser parnoki metetba o madokli ma?

¹¹Lishitsüng malidak naten meyidi ma? Tzü malidak tzütok meyidi ma?

¹²Ibaji ano lanu kümyanga alidang, melepsai, tanga süngo ajak dang temelaba azülar.

¹³Iba amaji Tsüngrem amadoker ajak lenmang atemer, aser yamaji Tsüngrem mamangba pur teimla samar.

¹⁴Pa temulung alemba süktanger; aser pa tamangji sorak ki ka mesük.

¹⁵Pai pei ki dak mangaloker, saka aji menoktaktsü; pai idakji tashi agi soter, saka aji agi matir.

¹⁶Anü tsüngdang tzü peria agia ainba süngdong mesüka pa lir, atsü meketa iba labi mesangshir.

¹⁷Pa tera lungnang meketa züloker; pai lung tsüngdai air.

¹⁸Pa par tesem nungi atsüngdokra, tesem jagi pa menangzüktsü aser ashitsü “Ni na kodanga munguka.”

¹⁹Ajiang, pa taküm lenmang nung tepelaji lir; aser auyi nungi tangar ka adoker.

²⁰Ajiang, Tsüngremi tetemjen nisung meindoktsü, mesüra pai tamajung inyakertem meyaritsü.

²¹Pai nebang menüshishi agi, aser nebangmechi ayimtenba agi tanaben süngtsütsü.

²²Ne temerirtem taak agi süngtsütsü, aser tamajunger süki makai akümtsü.