Read njo YOB 9 Bible Online

YOB 9 - njo bible

YOB 9

¹Idangji Yobi langzü;

² Atangji ya shitak ta ni metet; saka Tsüngrem madang kodaser nisungi meshia litet?

³Kati pa den o kadi süra; meyi ka nung khendanga pai melangzütettsü.

⁴Pa mulungjang tetemjen, aser pa tashi tait; pa anema temulung merangertem shirsa azükaru?

⁵Pai tenem belenshir, aser parnoki aji memeteter; pai ain adoka itemji mekepsatsür.

⁶Pai alima pa tamentakdak nungi anokshir, aser iba tongshitem atentener.

⁷Pai anü nem ozüng agütsür, aser aji madoker; aser pai petinutem shibangtsür.

⁸Pai dang anüngtem sadakjema salar. Aser tzüyim tzüsem manung jajar.

⁹ Pai anüng nung petinu tejep tejep, oda Arcturus, Orion, Pleiades, aser anüng tentsülen taktangtem yanglu.

¹⁰Mangajemba mapa tulu pai inyaker, hau, mezüngteti tesüngmangtsü mapa inyaker.

¹¹Ajiang, pai ni anasai süir, aser ni pa mangur; pa kü madang süir, saka ni pa majiteter.

¹²Ajiang, pai rakzükra shibai pa noktangtettsü? “Na kechisür” ta shibai pa dang shitettsü?

¹³Tsüngremi ain adokba mesoter; Rahab yarirtemia pa kübok mokremer.

¹⁴Ajangla pa dang koda ni langzütsü? Aser pa den o ashishiteptsü asoshi kü o koda shimtsü?

¹⁵Ni temeshi liaka, ni pa dang melangzütet; joko kü obendanger dang taochi asoshi ni mepishitsüba dang;

¹⁶Ni pa jala sang, pai kü dang langzüla; aji saka pai kü ola angatsü ta tamanga mamangla.

¹⁷Kechiaser pa yipru agi ni yirutsür; aser kecha masü nung kü komo moratsür.

¹⁸Pai ni tangula sashitsü memelar, saka taku agi ni süngtsür.

¹⁹Tashi dang toktepdi süra, pa tashi tait lir! Aser ochi indang okai odi süra, shibai pa jazüktsü?

²⁰Ni temeshi liaka, kü bang agi ni aitsütsü; ni tetemjen, saka pai ni tekirak ta ajar.

²¹Ni tetemjen; ni kü sasa züngshia mali; ni kü taküm sensamasar.

²²Ya ajak kasa dang; anungji ni ashir; tajungera tamajungera pai samatsür.

²³Kodang wara jagi aoksa-a südaktsür, shir tai maka par kangshiba pai menütsür.

²⁴Alima ya tamajunger ket nung agütsüogo; idakji obendanger tejak pai nembangtsür; pai mesüra shibai asütsü?

²⁵Kü anogotem asemjena odagi, parnoki jena aor aser kecha tajung mangur.

²⁶Itemi rong tekara ama jua aor, orijai pei chiyungtsü dak khenyongi yimlok ama.

²⁷Ni kü nemnemba amadokdi; kü tejak mekümba sangwadi ta shira;

²⁸Ni kü timtem ajak tsübur; kechiaser nai ni tai maka ta mashitsü ni metet.

²⁹Ni aitsütsüsa; ajangla amajok nung kechiba ni belemer?

³⁰Rürjep agi kü sasa shitokra; aser kü teka sabon agi metsükra;

³¹Idangji nai ni lishitsüngi nungoktsütsü, aser kü süoshi agia ni sempatsü.

³²Kechiyong ni pa dang langzütsüsa, aser küna o bendangi aotsüsa; pa ni ama nisung masü.

³³Künaprongla dak teka yitettsüsa; küna tsüngda nung tebendanger shinga mali.

³⁴Kü tsüngdang nungi pai pa ajok bener odakjang; aser pa tetsübutsü agi ni taoksadaktsü;

³⁵Idangjiang pa metsübui ni jembitsü; kechiaser kü dak tetsübu kecha mali.