Read njo TENÜNGSANG KEN 10 Bible Online

TENÜNGSANG KEN 10 - njo bible

TENÜNGSANG KEN 10

¹Oh KIBUBA kechiba na talang nung noktaka alir? Timtem mapang nung na kechiba atsükadoker?

²Tamajungeri asüküma sensaker rishikangshir, parnok tasa nung itemji pudaktsür.

³Tamajungeri pei mulungi aginüba nung mezümekümer; merumerur-i KIBUBA atakatemer aser magizüker.

⁴Tamajungeri pei asüküm nung KIBUBA mebushir. Pai mezümeküma Tsüngrem mali ta pei mulung nung bilemer.

⁵Pa lenmang ajak nung azükarur. Ne obendangba pa dang nungi talang nung lir; pai tsükchir dang sensaja repranger.

⁶Pai pei sasa ashir, “Ni marakzütsü; putu ajak nung ni timtema malitsü.”

⁷ Atakatem, tiyazü aser tekangshitsü agi pa tebang sünga lir. Tamajung aser tekülak pa temeli kübok lir.

⁸Pai yim anasa nükdanga atar; tai makar tepsettsü arür amener. Teyarir malirtem anema pai mita atar.

⁹Molusongzüi munger kübok miima aliba ama pai miima atar. Sensaker aputsü asoshi pai ata-a alir, pai teyarir malirtemji apur aser atsür aor.

¹⁰Teyarir malirtem pai menüngsatsür, pa tashi kübok parnok laor.

¹¹Pai pei sasa ashir, “Tsüngremi amadokogo; pai pei tejak nembanger, aser kodanga mangur.”

¹²Aramesoang, Oh KIBUBA, ne teka songtokang, Oh Tsüngrem, timtem nung alirtem tamadok.

¹³Kechiba tamajungeri Tsüngrem atalar? “Pai kü dang kecha mashitsü” ta kechiba pai pei sasa ashir?

¹⁴Saka Oh KIBUBA nai timtem aser tejashir dang repranger. Timtemeri ne nem bendanga agütsür; tebu malirtem dang nai yarir.

¹⁵Tamajung aser temenen nisung tekaji raksajang. Parnoki tanaben temenen meinyaktsüsa nai parnok merenshiang.

¹⁶KIBUBAji teti tatem maka chuba lir. Kintem pa lima nungi samatsütsü.

¹⁷Oh KIBUBA, ajemaluri mepishiba nai angashitsü, nai parnok mulungjang tashi ittsütsü.

¹⁸Alima nung aliba nisungi tetsübu mangutsüsa, tebu malir aser tekangshi nung alir tsütsü ne narong atentsü.