Read njo TENÜNGSANG KEN 102 Bible Online

TENÜNGSANG KEN 102 - njo bible

TENÜNGSANG KEN 102

¹Oh KIBUBA, kü sarasadem angangma; aser teyari asoshi ni ayimtenba na tonga arudakjang.

²Kü timtemba anogo nung kü dang nungi ne tejak atsüka telima; kü dangi ne narong shijang; ni ajaba anogo nung kü dang yakta langzüangma.

³Kechiyong kü anogotem mokozü ama sama-a aor, aser kü terettem mimung ama ronga lir.

⁴Kü mulungjang lureper aser ai ama akonger, ni chiyungtsü achitsü tejangraba sama.

⁵Kü tanüngba ola adokba agi, kü terettem kü shi nung mejaloka lir.

⁶Lisem lima nung pokpo ama ni lir, Azüngmeyakdak pokpo ka ama lir.

⁷Ni amua maor, aser kilem manung rongjena aliba ozü ka ama lir.

⁸Anogo tepiyong kü tsükchirtemi ni sensamasatsür; shirnoki ni anema atalatsür, kü tenüng tetshia atakatemer.

⁹Kechiyong ni amtsük ama aut achir, aser kü tajemtsü nüktzü den meyokteper.

¹⁰Kechiaser aji ne ain adokba aser ne terasaba yong lir. Kechiyong nai ni shia aru, aser ni endokadok.

¹¹Kü anogotem nikongdang akhüm ka amai lir; ni ai ama azüla-a aor.

¹²Saka nabo, Oh KIBUBA, teti tatem maka chuba, aser ne tenüng putu ajaki bilemtettsü.

¹³Na aramesotsü, aser Zion madak yimlibilem akatsü. Kechiyong la dang aochitsü iba mapang lir, hau, tataktet mapang tonga lir.

¹⁴Kechiyong ne tenzükertemi la meimer, la raksajaka; parnoki la asoshi aria bilemer, la raksa-a liaka.

¹⁵Anungji kintemi KIBUBA tenüng tsübutsü, aser alima chuba ajaki pa tashi tsübutsü.

¹⁶Kechiyong KIBUBAi Zion yanglutsü, Pa pei sentsüwangshi nung adoktsü.

¹⁷Tepetzük nisung sarasademba pai angar, aser parnok sarasademba pai mesensatsütsü.

¹⁸Ibai tarutsü putu asoshi zülua yuang, anungji ano mesoi aliba nüburtemi KIBUBA asangtsü.

¹⁹Kechiyong pai pa temeshi tenem nungi ajia yok; anüng nungi KIBUBAi alima reprang.

²⁰Tepuokdak alir anüngba angashitsü; tasütsü aliba purtem chioktsü;

²¹Aji asünung KIBUBA tenüng Zion nung sangoktsütsü, aser Yirusalem nung pa nüng asangtsü.

²²Kodang nisungtemji külemi sentepdir, aser chuba yimlitemi KIBUBA külemtsü.

²³Ni tain mekümjongi kü tashi maiti kümogo; Pai kü anogo tatsü kümdaktsü.

²⁴Ni ashi, “Oh, kü Tsüngrem, kü anogo matongdang ni bener tuo. Ne kümtem putu ajak süitema alir.”

²⁵ Alemli nungi nai alima kimung yanger; aser anüngtemji ne teka agi yanglu.

²⁶Parnok samadoktsü, saka nabo alitsü; Hau, parnok ajak sobutsü amai ajentsü; süoshi ama nai parnok melentsütsü, aser parnok melenshitsü.

²⁷Saka nabo kasa lir, aser ne taküm tatembang malitsü.

²⁸Ne tenzüker chirtem maneni kümzüka alitsü, aser ne tawabangba kübok parnok metsü kümzüka alitsü.