Read njo TENÜNGSANG KEN 103 Bible Online

TENÜNGSANG KEN 103 - njo bible

TENÜNGSANG KEN 103

¹Oh, kü nela, KIBUBA sangang; aser kü dak aliba ajak agi pa temeshi tenüng sangang.

²Oh, kü nela, KIBUBA sangang; aser pa teyaritem tamadok.

³Shibai ne tai ajak atoker; shibai ne tashitak ajak anebtsür;

⁴shibai ne taküm kangla nungi alangzüker; shibai temeim aser taochi agi ne nem korang semtsür;

⁵shibai tajung agi ne tejangraba tiptemdaktsür. Aji asünung mongzü ama ne asangwa tanaben tasen kümdaktsür.

⁶KIBUBAi rishikangshia alir ajak asoshi o bendangtsür, aser parnok nem temeden agütsür.

⁷Pai Mosa dang pa sentong, aser Israel chirtem dang pa mapatem metetdaktsü.

⁸ KIBUBA yimlibilem aser taochi agi sünga lir, ain adoktsü meilungi aser temeim yimlibilem nung talubosa lir.

⁹Pai tetibo marütsütsü; mesüra pa ain adoka tetibo malitsü.

¹⁰Asen temenen yari pai asen dang mebenshir, mesüra asen tai yari asen nem majangzüktsür.

¹¹Kechiyong alima temalen talang nung anüng aliba ama, yamaji pa tsübubatem dang pa temeim yimlibilem lir.

¹²Aser anüdoklen nungi anüolen tashi koma talang ali, papigaji asen ozüng raksabatem pai asen nungi agientsür.

¹³Tebui pei chirtem dang aochiba ama, yamaji KIBUBAi pa tsübubatem dang aochir.

¹⁴Kechiyong asen kechi agi yanglu pai metet; asenok auyi dang ta bilemteter.

¹⁵Nisung asoshibo, pa anogotemji ai ama lir; moapu nung naro ama, pa apunger.

¹⁶Kechiyong iba manung mopung süia aor, aser aji makai akümer; aser iba talidak jagi joko aji memetettsü.

¹⁷Saka shirnoki pa tsübur, parnok dak KIBUBA temeim yimlibilemji tatem maka, aser pa temeshibaji chirnur nungi chirnur tashi alitsü.

¹⁸Shirnoki pa tezüngzüktepba, aser pa temelabatem benshitsü bilemteter.

¹⁹KIBUBAi pa menden anüngtem nung yanglua lir; aser pa yimli ajak madak chubatsü.

²⁰KIBUBA moajang, nenok pa tenyartem. Pa ola nung tenarong tena, pa o angar, nenok tashi tulu rogotem,

²¹KIBUBA moajang, par temeranger telok ajak, Pa tenzükertem shirnoki pa mulungba inyaker!

²²KIBUBA moajang, pa mapa ajaki, yimsüsüba yimli ajak nung! KIBUBA moajang, Oh kü nela!