Read njo TENÜNGSANG KEN 104 Bible Online

TENÜNGSANG KEN 104 - njo bible

TENÜNGSANG KEN 104

¹Oh Kü nela, KIBUBA moajang. Oh KIBUBA kü Tsüngrem, na kanga tulu lir. Na tetushi aser tamaren agi sobua lir.

²Shibai tesangwa agi süoshi ama ne sasa sobua lir; shibai süki ama anüngtem atsülanga toktsür;

³shibai pei temaba taktang sangwatsüng tzü nung yutsür; shibai mepettem pei talungtsü kümdaktsür; shibai mopung tashikang manung jajar,

⁴ shibai mopungtem pa osang abenertem kümdaktsür, pa tenzükertem milak adokba mi kümdaktsür;

⁵pai alimaji iba tongshi manung yanglu, angji teti aji marakzütsü asoshi,

⁶nai aji süoshi agi ama molutzü agi nembangtsü. Tzüji tenem temalen noktak.

⁷Nai arütsü nung parnok ajen. Ne tsüngmok ola agi parnok yakta jena oadok;

⁸parnok tenemtem tashi atu, aser lenten tashi alu koba nai parnok asoshi shimteta toktsü.

⁹Parnoki ajanga maotsü nai arrtsü yanglua toktsü. Angji tanaben parnoki alima meyipa menembangtsü.

¹⁰Nai ayongnutem lenteni yima yoker; tenem tsüngda nung parnok ayimer.

¹¹Moapu shiruru shia nem parnoki tajemtsü agütsür; arem gadotem tzüra atemer.

¹²Parnok anasa anüng ozütem parnok talidak lir, kongsangtem nung parnoki ken atener.

¹³Ne temaba taktang nungi nai tenemtem nung tzü agütsür. Alima ne mapatem süngjang agi sünga lir.

¹⁴Kiset shirurutem asoshi nai ai adokdaktsür, aser nisungtem asoshi ali nungi chiyungtsü adokdaktsür.

¹⁵Nisung mulung peladaktsütsü asoshi yi, tejak sangwadaktsütsü asoshi totzü, aser tashi itdaktsütsü asoshi chiyungtsü.

¹⁶KIBUBAr süngdongtem tiptema lir; Lebanon cedar süngdongtem koba pai atem;

¹⁷yangji ozütemi parnok tesep yanglur; stork ozü pei tesep fir süngdong nung lir.

¹⁸Tenem talangtemji shio atema lir; aser lung tulutemji shisen jenokdak lir.

¹⁹Nai ita mapang tatakzük sayutsü asoshi yanglu. Anüi pei aiba mapang meteter.

²⁰Nai ammang yanglur, aser aji aonung akümer, koba nung arem shiruru ajak ayazür.

²¹Molusongzü pungtu chanui tetepsettsü shiruru arr-a bushir, aser Tsüngrem nungi parnok chiyungtsü angur.

²²Anüji adoker, parnok meyipadoker, aser parnok leprungki nung ontaka alir.

²³Nisung pei mapai aor, aser aonung matong tashi inyaker.

²⁴Oh KIBUBA, ne mapatem koda jenti lir! Parnok ajak nai ne shisatsü tesangra agi yanglu. Ne teyanglubatem agi alima sünga lir.

²⁵Oagi tzüyim lir, tulu aser tesadem, kong mezüngdangtetba shirurutem lir; shiruru tila o tulu na.

²⁶ Yangji rongtem aor; yangji nai yangluba molu tzürangtem kazüa senzür.

²⁷Item ajaki, nai parnok nem mapang tetemsü nung, chiyungtsü agütsütsü ata-a alir.

²⁸Nai parnok nem agütsüba parnoki bendener. Nai ne ket salar, parnok tajung agi asünger.

²⁹Nai ne tejak miimadokdang, parnok timatemer; kodang nai parnok chiyungtsü bener oadoker, parnok asür. Aser tanaben auyi akümer.

³⁰Kodang ne tangula nai yokdir parnok pokteter, aser nai alima tejak tasen kümdaktsür.

³¹KIBUBA sentsüwangshi teti lidakjangma! KIBUBAi pei mapa nung pelashishia liangma!

³²Pai alima dak repranger aser aji anokshir. Pai tenemtem dak kongshir aser parnoki mokozü alonger!

³³Ni taküm ali tashi KIBUBA dang ni ken tenyutsü. Kü dak taküm alidang ni Tsüngrem dang ken atentsü.

³⁴Kü teshisadangba pa madang taginütsüsa süangma. Ni KIBUBA nung pelashishia alitsü.

³⁵Temenenpur alima nungi samadakjangma! Aser tamajunger joko telidaktsü. KIBUBA moajang, Oh kü nela! KIBUBA sangang.